Adamdardy qutqarý bizdiń paryzymyz - Danııar Sembaı

Aqtóbe qalasyndaǵy sýdan qutqarý jumystary úzdiksiz júrip jatyr. Buǵan deıin habarlaǵanymyzdaı, qalada tótenshe jaǵdaı jarııalandy. Arnaıy komıssııa qurylyp, sý astynda qalǵan baspanalardyń shyǵynyn esepteý jumystary júrgiziletini jarııa boldy.

Al qazirgi ýaqytta baspanasy sý astynda qalǵan adamdar qaladaǵy mektepterge qonystandyryldy. Jergilikti bılik úsh mezgil tamaqpen qamtamasyz etti. Al aqtóbelikter zattaı kómek berip jatyr .

Sýdan qutqarý jumystaryna polıtsııa qyzmetkerleri de jumyldyryldy. Búgin polıtsııa qyzmetkerleriniń jumysy áleýmettik jeli arqyly keń tarap, aqtóbelikter olardyń eńbegine rızashylyǵyn bildirip jatyr. Quqyq qorǵaýshylar arnaıy rezeńke kıim kıip, baý-baqsha ujymdarynda ıesiz qalǵan baspanalardy kúzetýge kóshti. Jumys úzdiksiz, demalyssyz júrip jatyr.

«Adamdardy qutqarý bizdiń paryzymyz. Ózim Zaýyt polıtsııa bóliminiń kámelet jasqa tolmaǵandar jónindegi ınspektory bolyp jumys isteımin. Úsh kúnnen beri sýdan qutqarý jumystaryna qatysyp, úıinen shyǵa almaı qalǵan adamdardy tasyp júrmiz. Olardyń kıim-keshegin alyp shyǵyp, ótinishterin oryndadyq. Kóbi ıesiz qalǵan úılerin amanat etip ketedi. Bizdiń mindetimiz - kúzetti kúsheıtip, qaýip seıilgenshe múliktiń qoldy bolyp ketpeýin qadaǵalaý»,- dedi polıtsııa leıtenanty Danııar Sembaı.

Jas maman Zaýyt polıtsııa bólimine bir jyl buryn jumysqa ornalasqan. Ol Malkejdar Bókenbaev atyndaǵy Aqtóbe zań ınstıtýtyn bitirip, qyzmetke turdy.

«Bizge arnaıy kıim berilip, qutqarý, kúzetý jumystaryn tapsyrdy. Ári bul bizdiń azamattyq boryshymyz. Adamdar úshin qıyn. Olar jalǵyz baspanasyn tastap, bizge senim artty. Senimdi aqtaý bizdiń paryzymyz ári mindetimiz»,- dedi Danııar Sembaı.

Aıta keteıik, Aqtóbe qalasy mańynda Aqtóbe, Sazdy, Qarǵaly sý qoımasy toldy. Qazirgi ýaqytta Aqtóbe men Sazdy sý qoımasy ashylyp, Elek ózeni arnasynan tasyp jatyr.