Adamdardy quldyqta ustap kelgen qostanaılyq eks-polıtseı sottaldy
QOSTANAI. QazAqparat – Qostanaı oblysynda er adamdy shynjyrǵa baılap ustap, keıin óltirip tastaǵan meıramhana basshysy sottaldy, dep habarlaıdy QazAqparat oblystyq sottyń baspasóz qyzmetine silteme jasap.
Іs derekterinde kórsetilgendeı, Qostanaı oblysy Meńdiqara aýdanyndaǵy «Karavan» dámhanasynyń basshysy 2016 jyldan bastap birneshe adamdy quldyqta ustap kelgen. Er adamdardy tegin jumys istetip, boıjetkenniń tánin satýǵa deıin barǵan. Eń alǵash bul oqıǵa týraly «Damytý» qoǵamdyq qorynyń tóraıymy Nına Kosıýk bilip, polıtsııaǵa ótinish jazǵan.
«Dámhana basshysy Tımýr Alataev jábirlenýshilerdi shynjyrda ustap, baılap otyrǵan. Las qoldarymen qazannan as ishkeni úshin Nına Kosıýktiń inisi 34 jastaǵy Ivan Kosıýkti óltirip tastaǵan», - dep habarlaǵan bolatyn Nına Kosıýk.
Sot aldynda 3 adam jaýap berdi. Olar: 41 jastaǵy dámhana basshysy Tımýr Alataev, Borovskoe aýylynyń turǵyndary Vıacheslav Evdokımov pen Ramıl Abdýlhaev. Sotta aıtylǵandaı, Tımýr Alataev polıtsııada qyzmet etken. Zań mamandyǵyn aıaqtaǵan.
Sot úkimimen Tımýr Alataev 17 jylǵa, Vıacheslav Evdokımov 14 jylǵa bas bostandyǵynan aıyryldy. Olar jazasyn qaýipsizdigi ortasha túzetý mekemesinde óteıdi. Al Ramıl Abdýlhaev 3 jylǵa sottaldy.
