Adamdardy kishkentaı kezinen densaýlyǵyn oılaýǵa úıretý kerek - Qasym-Jomart Toqaev
NUR-SULTAN. QazAqparat - Adamdardy kishkentaı kezderinen densaýlyǵyn oılaýǵa úıretý kerek. Bul týraly Ulttyq qoǵamdyq senim keńesiniń 3-otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Biz 2010 jyldan bastap densaýlyq saqtaýdyń birqatar baǵyttaryn, atalǵan nysandardyń ekstensıvti tıimdiligin ońtaılandyrýǵa basymdyq berdik. Nátıjesinde myńǵa jýyq ınfektsııalyq tósek-oryn qysqartyldy. Bıologııalyq qaterdi qaperge ala otyryp, Úkimet belgili bir baǵyttar boıynsha densaýlyq saqtaý júıesiniń artyq ekendigine jáne olardy synı jaǵdaıdarǵa daıyn ustap turýǵa qatysty máseleni qarastyrý qajet», - dedi Memleket basshysy.
QR Prezıdenti azamattardyń densaýlyǵyn qorǵaý úshin preventıvti medıtsınalyq-sanıtarlyq sharalardy qabyldaýǵa birinshi kezekte nazar aýdarý qajettigin basa aıtty.
«Árıne, bir jaǵynan biz aýrýhanalar salýymyz qajet. Bul - azamattarymyzdyń densaýlyǵyn qamtamasyz etý jáne qorǵaý máselesi. Bul - úlken strategııalyq mindet te. Ekinshi jaǵynan, Densaýlyq saqtaý mınıstrligi jáne ózge de tıisti vedomstvolar adamdardy kishkentaı kezderinen óz densaýlyqtaryna qamqorlyq tanytýǵa oqytýy, azamattarymyzdyń densaýlyǵyn qorǵaý boıynsha sanıtarlyq-medıtsınalyq sharalardy qabyldaýy qajet», - dep atap ótti Qasym-Jomart Toqaev.
