Adamdardy qar qursaýynan qutqarǵan qaraǵandylyq polıtseılerge 100 myń teńgeden tabys etildi
QARAǴANDY. QazAqparat – Qaraǵandyda borandy kúnderi qar qursaýynan kólikterdy alyp shyǵyp, adamdardy qutqarýǵa atsalysqan tártip saqshylaryna gramotalar men aqshalaı sertıfıkattar berildi, dep habarlaıdy QazAqparat tilshisi.
Qaraǵandy oblysynyń polıtsııa departamentinde qyzmetkerlerdi marapattaý rásimi ótti. Oblys PD bastyǵy polıtsııa polkovnıgi Erlan Faızýllın áriptesterine keýde belgileri men aqshalaı sertıfıkattar tabys etti.
«Bizde polıtsııa qyzmetkerleriniń kúndelikti kásibı jumysynda atqarǵan jarqyn isteri az emes. Atap aıtqanda, respýblıka aýmaǵynda qar qursaýynan adamdardy evakýatsııalaý kezinde kórsetken batyldyq, janqııarlyq erlikterin keltirýge bolady», - dep atap ótti Erlan Faızýllın.
Oblystyń bas polıtseıi eki qyzmetkerge ІІ dárejeli «ІІM úzdigi» tósbelgisin, bir polıtseıge «Qutqarý operatsııalaryna belsendi qatysqany úshin» tósbelgisin, eki tártip saqshysyna «QR ІІM Qurmet gramotasyn», taǵy eki polıtsııa qyzmetkerline QR ІІM gramotasyn, eki qyzmetkerge QR ІІM Alǵys hatyn tabys etti. Olardyń barlyǵy 100 myń teńgeniń sertıfıkatyna ıe boldy.
Sonymen qatar oblystyq polıtsııa departamentiniń bastyǵy Qaraǵandy qalasynyń ІІD JPB qyzmet ınspektory, qatardaǵy polıtseı Damır Orazovqa ІІM sımvolıkasy bar qol saǵatty jáne 100 myń teńgeniń sertıfıkatyn tabys etti. Onyń áriptesi, Qaraǵandy qalasy ІІB PPP taǵylymgeri Tımýr Sultanǵazy ІІM sımvolıkasy bar qol saǵat aldy.
Buǵan deıin habarlaǵanymyzdaı, ótken aptada osy eki batyl qyzmetker mas kúıinde bes qabatty úıdiń shatyryna shyǵyp ketken er adamdy qutqarǵan bolatyn.
