Adamdardy bir kórgennen ajyratatyn psıhologke aınalasyń – elorda áýejaıynyń qyzmetkeri
NUR-SULTAN. QazAqparat – Astanalyq Ásel Rámeshtiń aıtýynsha, áýejaıdyń tekserý qyzmetinde jumys isteý ońaı emes. Sebebi tekserý qyzmetiniń ınspektorlary jolaýshylardyń áýe bortyndaǵy qaýipsizdigine jaýap beredi. Olar jumysqa erte baryp, kesh qaıtady. 8 naýryz halyqaralyq áıelder kúni merekesi qarsańynda QazAqparat tilshisi Nursultan Nazarbaev halyqaralyq áýejaıynyń tekserý bóliminiń qyzmetkeri Ásel Rámeshpen áńgimelesip, jumysymen tanysqan edi.
Ásel Rámesh elorda áýejaıynyń tekserý qyzmetinde 2,5 jyl jumys istep keledi. Ol bos jumys orny týraly qurbysynan estip, birden túıindemesin jibergen. Aıtýynsha, áýejaıǵa jumysqa turý ońaıǵa soqpaǵan.
Tekserý bólimindegi ınspektor mindetine kirispes buryn, áýejaıdyń janyndaǵy arnaıy oqý ortalyǵynan 1 aılyq kýrstan ótip, bilimin jetildirgen. Bolashaq ınspektorlar 1 aıdyń ishinde jolaýshylar ushaqqa alyp minýge bolmaıtyn zattardy anyqtap, tabýdy teorııa jáne praktıka júzinde úırenedi. Mysaly, olar tekserýden ótken kezde ekrannan sómkedegi qarýdy, tyıym salynǵan zatty nemese suıyqtyqty birden anyqtaıdy.
«Jolaýshylar ártúrli bolady. Bári birdeı sómkesinde ne baryn kórsetkisi kelmeıdi, tártipke baǵynǵysy kelmeıtinder bar. Biz olarǵa tekserý ol qaýipsizdik maqsatynda júretinin túsindirýge tyrysamyz. Áýe bortyndaǵy jolaýshylardyń qaýipsizdigine tikeleı biz jaýap beremiz, sondyqtan da jolaýshylar men olardyń júgin tekserý mindetimiz. ıAǵnı áýe reısiniń qaýipsizdigi bizdiń óz mindetimizdi qalaı atqaratynymyzǵa baılanysty», - dedi Ásel Rámesh.
Sondaı-aq, tekserý bóliminiń ınspektory jolaýshylardyń áýe bortynda alyp júrýge tyıym salynǵan zattardy taǵy bir eske saldy.
«Ózińizben birge 100 ml-nan artyq suıyqtyq alyp júrýge bolmaıdy. Suıyqtyqtyń quramynda spırt 70 paıyzdan artyq bolsa, oǵan da tyıym salynǵan. Sonymen qatar jarylǵysh jáne radıoaktıvti zattarǵa jáne tez janatyn zattarǵa ruqsat joq. Sol sııaqty qatty, ınvektsıalyq jáne bıologııalyq zattardy alyp júrýge bolmaıdy. Odan bólek, áýe bortynda qarý-jaraq, oq-dári jáne jumysqa arnalǵan qural-saımandarǵa jol berilmeıdi», - deıdi ol.
Aıta ketsek, elimizde qańtar aıynda jappaı tártipsizdikter bolǵan kezde elorda áýejaıy shtattyq rejımde jumys istep turdy.
«Jappaı tártipsizdikter kezinde buzaqylar Almaty áýejaıyn qıratqan kezde, men osynda jumysta boldym. Sol kúnderi kúsheıtilgen rejımde jumys istedik. Bizge polıtseıler men shekara qyzmeti mamandary kómektesti. Sondyqtan da jumysqa shyǵýǵa qoryqqan emespin. Ereýil kezinde jolaýshylardyń qaýipsizdigi aldyńǵy qatar turdy. Ár jolaýshyny qatań tekserdik. Jalpy maǵan adamdarmen jumys istegen unaıdy. Kún saıyn ártúrli adammen kezdesip, jańa aqparat bilip jatasyń. Qandaı jaǵdaıǵa qaramastan biz jolaýshylarǵa jyly jaýap berip, kúlimsirep turamyz. Ýaqyt óte kele, adamdardy bir kórgennen ajyrata biletin psıhologqa aınalasyń. Jolaýshylardy tanı túsip, olarmen ortaq til tabysyp ketemiz», - deıdi áýejaı qyzmetkeri.
Onyń aıtýynsha, áýejaıdyń tekserý bólimi ınspektorlaryna qoıylatyn taǵy bir talap tildi meńgerýi. Talap boıynsha olar joǵary bilimdi jáne 3 tildi (qazaq, orys, aǵylshyn) bilýi tıis.
«Es bilgeli avıatsııa salasynda jumys isteýdi armandadym. Jolaýshylardy qalaı otyrǵyzady, tekserýden qalaı ótkizedi, ushý kezinde ne bolady osynyń bári men qyzyqtuǵyn. Araǵa birneshe jyl salyp meniń armanym oryndaldy. Búginde avıatsııa salasynda eńbek etip jatyrmyn. Menimshe, armanǵa qol jetkizý úshin oǵan sený kerek jáne sol jolda ter tógý qajet», - deıdi Á.Rámesh.
