Adamdardy 185 mıllıon teńgege aldap soqqan almatylyq sottaldy
Almaty qalalyq Polıtsııa departamentiniń málimetine sáıkes, 2019 jyldyń tamyz aıynda Dılfýza Aldabergenovanyń ústinen 64 adamnan aryz tústi. Olar jalpy somasy 185 mıllıon 802 myń 400 teńgeni quraıtyn materıaldyq zalal keltirilgendigi týraly ujymdyq málimdeme jasaǵan.
Bul fakt Bostandyq aýdandyq polıtsııa basqarmasynyń sotqa deıingi tergep-tekserýdiń biryńǵaı tiziliminde QR QK-niń 190 baby, 3 bóligi, 1,4 tarmaǵy boıynsha tirkelgen.
«Sotqa deıingi tergeý barysynda anyqtalǵany, 2018 jyldyń maýsym aıynan bastap 2019 jyldyń qyrkúıek aıyna deıin azamatsha Aldabergenova áleýmettik jeliler arqyly ınvestıtsııalyq jobanyń ashylatyndyǵyn jarııalady. Jobanyń máni býkmekerlik keńselerge, sondaı-aq, ár túrli bıznes-jobalarǵa aqsha salý arqyly qarajatty kóbeıtý boldy.
Osylaısha, salymshylar 30% jáne 50% paıda tabý úshin banktik kartalar arqyly uıymdastyrýshyǵa jáne basqa adamdarǵa qarajat aýdardy, biraq keıinnen eshqandaı paıda tappady. Aldabergenova salynǵan qarajatty qaıtarǵan joq. Tergeý barysynda kúdikti ustalyp, sot sheshimimen qamaýǵa alyndy», - dedi, Almaty qalalyq Polıtsııa departamenti bastyǵynyń orynbasary Rústem Ábdrahmanov.
Tergeý Dılfýza Aldabergenovanyń kinásin dáleldedi. Qylmystyq is boıynsha is júrgizý kýálandyrylyp, olardyń materıaldary sotqa jiberildi.
Almaly aýdandyq sotynyń sýdıasy D.A. Aldabergenovaǵa qatysty QR QK-niń 190 baby, 4 bóligi, 2 tarmaǵy jáne QR QK-niń 217 baby, 3 bóligi, 2 tarmaǵy boıynsha 6,8 jylǵa bas bostandyǵynan aıyrý týraly úkim shyǵardy.