Adamdardy bopsalap, aqsha talap etken: Polıtsııa Sandýǵash Turlybekovaǵa qandaı aıyp taqty

QYZYLORDA. KAZINFORM — Qyzylorda oblysy Jańaqorǵan aýdanynyń turǵyny Sandýǵash Turlybekovany ustaý deregi boıynsha polıtsııa túsinik berdi.

Áleýmettik jelide qoǵam belsendisi, kópbalaly ana Sandýǵash Turlybekovany polıtsııa ustap áketip bara jatqany beınelengen foto tarady. 

Osyǵan oraı Qyzylorda oblysy polıtsııa departamenti qylmystyq is qozǵalǵanyn, qazir tergeý júrip jatqanyn málim etti. 

Oqıǵanyń mán-jaıyna baılanysty Jańaqorǵan aýdandyq polıtsııa bólimi málimdeme jasady.

«28 aqpan jáne 6 naýryz kúnderi Qyzylorda oblysynyń polıtsııa departamentine oblystyń eki turǵyny júgindi. Olar osy azamatshany qylmystyq jaýapkershilikke tartý jóninde aryzdanǵan. Turlybekova bopsalaý arqyly ar-namys pen qadir-qasıetke nuqsan keltiretin málimetterdi taratamyn dep qorqytyp, jábirlenýshilerden iri kólemde aqsha talap etken. Bul derek boıynsha qylmystyq is qozǵaldy. Turlybekova aýyr qylmys jasady degen kúdikke ilinip otyr. Budan bólek taǵy birneshe bopsalaý faktileri anyqtaldy. Protseske qatysýshylardyń jaýabyn burmalaýǵa yqpal etip, tergeýdiń jan-jaqty júrgizilýine kedergi keltirýi múmkin. Osyǵan baılanysty tergeý soty ony kúzetpen ustaý sharasyn sanktsııalady. Ustaý zań sheńberinde júrgizildi. Arnaıy quraldar men jaýyngerlik ádister qoldanylǵan joq. Kúdikti ýaqytsha ustaý ızolıatoryna qamaldy. Tergeý múddesi úshin ózge aqparat jarııa etilmeıdi», — dep atap ótti Jańaqorǵan aýdandyq polıtsııa bóliminen.