Adamdar JOO, kolledj, mektepterdegi jemqorlyqty aıtyp shaǵymdanady - Prezıdent

NUR-SULTAN. QazAqparat - Azamattarmen dıalog ornatý arqyly qoǵam narazylyǵyn týǵyzǵan túıtkildi salalardy anyqtaýǵa bolady. Bul týraly sybaılas jemqorlyqqa qarsy kúres máseleleri jónindegi keńeste sóz sóılegen QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Azamattarmen dıalog ornatý arqyly sybaılas jemqorlyq beleń alyp, qoǵam narazylyǵyn týǵyzyp júrgen túıtkildi salalardy anyqtaýǵa bolady. Adamdar burynǵysha joǵary oqý orny, kolledj, tipti, mektepterdegi sybaılas jemqorlyqty aıtyp, shaǵymdanady. Jemqorlyq azamattarymyzdyń boıyna sińip, tipti, qoǵamnyń qalypty qubylysyna aınalyp ketýi múmkin. Basty másele – osy», - dedi Qasym-Jomart Toqaev.

Memleket basshysynyń dereginshe, kásipkerler Jer komıteti, órtke qarsy qyzmet, salyq jáne keden organdaryn jemqorlyq jaılaǵan dep esepteıdi. Joldyń sapasyna baılanysty da jurtshylyqtyń alańdaýshylyǵy joǵary.

«Sondaı-aq, Sybaılas jemqorlyqqa qarsy is-qımyl komıssııasy maǵan sý sharýashylyǵy salasynda aıtarlyqtaı túıtkilder bar ekenin habarlady. Mine, osy máseleler boıynsha qoǵamdyq baqylaý tetigi jumys jasaýǵa tıis. Bul sharaǵa úkimettik emes uıymdardy tartqan jón. Olardy normatıvtik-quqyqtyq aktilerdi saraptaý isine qatystyrý kerek», - dedi QR Prezıdenti.