Adamdar jyl saıyn 1 mıllıard tonnadan astam azyq-túlikti qoqysqa tastaıdy – BUU
ASTANA. KAZINFORM – Álem halqy jyl saıyn 1 mıllıard tonnadan astam azyq-túlikti qoqysqa tastaıdy, ol jahandyq parnıktik gazdar shyǵaryndylarynyń 10 paıyzyn quraıdy. Bul týraly Birikken Ulttar Uıymy habarlady.
Esepke sáıkes, Brazılııanyń Belem qalasynda ótken BUU klımattyq konferentsııasynda adamdar men planetany klımattyq daǵdarystyń saldarynan qorǵaýǵa, ekologııalyq ádildikti nyǵaıtýǵa jáne turaqty bolashaqty qamtamasyz etýge baǵyttalǵan birqatar mańyzdy bastamalar usynyldy.
Atap aıtqanda, Birikken Ulttar Uıymynyń qorshaǵan ortany qorǵaý baǵdarlamasy (UNEP) jáne seriktesteri «Azyq-túlik shyǵynyndaǵy serpilis» (Food Waste Breakthrough)bastamasyn bastady. Onyń maqsaty – jahandyq azyq-túlik qaldyqtaryn eki ese, metan shyǵaryndylaryn 7 paıyzǵa azaıtý jáne 2030 jylǵa qaraı jahandyq ashtyqty toqtatý.
– Álem jyl saıyn baı jáne kedeı elderde úlken kólemde azyq-túlik ysyrap etedi. Azyq-túlik qaldyqtaryn azaıtý ashtyqpen kúresý men metan shyǵaryndylaryn azaıtýdyń kilti bolyp tabylady, - dedi UNEP basshysy Inger Andersen.
Jahandyq qorshaǵan ortany qorǵaý qory qarjylandyratyn jańa baǵdarlama elder men qalalarǵa tamaq qaldyqtary men metan shyǵaryndylaryn azaıtý boıynsha ulttyq strategııalardy ázirleýge, damýshy elderde dáleldengen sheshimderdi beıimdeýge jáne keńeıtýge, sondaı-aq osy saladaǵy halyqaralyq yntymaqtastyqty nyǵaıtýǵa qoldaý kórsetedi.
Eske sala keteıik, Sýdan halqynyń úshten eki bóligi gýmanıtarlyq kómekke zárý ekenin jazǵanbyz.