Adamdar shydamsyz bolyp barady - zertteý
NUR-SULTAN. QazAqparat - «Tehnologııalar kesirinen qazir ómirimizdiń jyldamdyǵy artty. Onyń nátıjesi ne bolady?», dep jazady Le Monde.
«Adamdar smartfondaǵy qosymsha lezde ashylmasa, ashýlanady. Kassada uzaq kútý kerek bolǵan soń dúkenge barýdan bas tartady. Eski fılmderdi kórgisi kelmeıdi. Sebebi sıýjettiń tym baıaý júretinin unatpaıdy. Adamdar rasymen, shydamsyz bolyp bara ma?», - deıdi maqala avtory Lora Belo.
Onyń paıymynsha, adamdardyń shydamsyzdyǵynyń artýy birneshe ǵasyr boıy júrgen evolıýtsııa nátıjesi. Degenmen, sońǵy onjyldyqta qarjy naryǵynyń ónimdilikke áseri, sonymen qatar tsıfrlyq tehnologııalardy paıdalaný bul tendentsııany arttyra túsken.
«Shydamsyzdyq - jyldamdyq ıdeıasymen basqarylatyn áleýmettik ómir nátıjesi. Qazirgi tańda adam kúndelikti qabyldaıtyn aqparat legi anaǵurlym kóbeıgen. Sol sebepti bizge ýaqyt jetpeıtindeı kórinedi», - deıdi ol.
«Búgingi tańda ıissý tutynýshy nazaryn aýlaý úshin jarty mınýt qajet etiledi. Al 1980 jyldary ıissý tańdaý úshin on mınýt qajet bolatyn», - deıdi marketolog mamandar. Atap ótilgendeı, osy shydamsyzdyqty bilgendikten mamandar ıissýlarǵa jyldamyraq áreket etýge ıtermeleıtin jemis nemese tátti ıisterdi kóptep paıdalanady.
«Adamdardyń qarym-qatynasyna keler bolsaq, ınternettiń, odan keıin áleýmettik jeli men smartfondardyń birinen keıin biri paıda bolýy tsıfrlyq quraldarǵa qoly jetimdi adamdardyń ómirin túbegeıli ózgertti. Mysaly, amerıkalyq jelide alǵashqy sms 1992 jyly jiberildi. Al 2019 jyly jańa jyl qarsańynda 60 sekýnda álem boıynsha 41,6 mıllıon habarlama jiberilgen. Buǵan árıne, WhatsApp, Facebook Messenger, WeChat sekildi qosymshalardyń áseri mol», - dep jazady avtor.
Aqparatqa sáıkes, on adamnyń segizi oıana sala smartfonyna kóz tastaıdy.
«Qazirgi tańda adamzat tereń ózgerister kezeńin bastan ótkerip jatyr. Damyǵan elderde úlkender de, jasóspirimder men balalar da az uıyqtaıtyn bolǵan», - deıdi áleýmettanýshylar. Al psıhıatr Patrıs Herreniń aıtýynsha, ata-ananyń shydmsyzdyǵy balalarǵa berilip jatyr.
«Bul jaǵdaılardyń barlyǵy adam nazaryn buzady. Adamdar ár nársege az ýaqyttan bóletindikten, jyldam áreket etý kerek dep oılaıdy», - deıdi neırobıolog Jan-Fılıpp Lasho.
Onyń aıtýynsha, tabıǵat jyldamdyǵyna saı ýaqyt pen qarjy jáne tehnologııalyq ýaqyt arasynda balans bolýy kerek. Biraq adamdar kitap oqyp, jaı serýendep, qur aspanǵa qaraý, ıaǵnı ózine ýaqyt bólýdi azaıtyp jatyr.
