Adamdar ortaq maqsat jolynda birikse, kóp is tyndyra alady - Rada Haırýsheva
-Rada, aldymen óz ómiriń týraly áńgimelep berseń?
-Meniń ómirimniń zamandastarymnan kóp ereksheligi joq. Oral qalasynda dúnıege keldim, otbasynda jalǵyz balamyn. Anam zańger bolsa, ómir boıy temir jol salasynda qyzmet etken ákem qazir qurmetti demalysynda. Kishkentaıymnan ata-anam elge jaqsylyq jasaýdyń qandaı ekendigin, meıirimdiliktiń úlgisin kórsetip keledi. Úıimizge qonaq kóp keletin, olar muqtaj jandarǵa qolushyn sozýdan jalyqpaıtyn. Aýyldan qalaǵa oqýǵa kelgen týma-týystyń balalary bizdiń úıde turatyn. Mektepke deıin ájemniń baýyrynda boldym. Ol kisi meni erekshe jaqsy kóretin. Ózi 36 jasynda jeti balamen jesir qalyp, bárin jalǵyz ózi jetkize bildi. Ájemiz baýyrmaldylyqqa, bir-birimizge kómektesýge úıretti. Meniń qaıyrymdylyqqa bet burýym sondaı izgi jandardyń tárbıesi bolar dep oılaımyn.
Oraldaǵy №17 orta mektepti úzdik bitirgennen keıin eńbek jáne áleýmettik qatynastar akademııasyn da sondaı baǵaǵa támamdap, zańger mamandyǵyn ıgerdim. Odan keıin Qazaqstan aqparattyq tehnologııalar jáne basqarý ınstıtýtyn qarjy jáne nesıe mamandyǵy boıynsha oqyp bitirdim. Oǵan qosa Astanadaǵy «Turan» ýnıversıtetiniń memlekettik jáne jergilikti basqarý mamandyǵy boıynsha magıstrantymyn. On jeti jasymnan zań agenttiginde, sosyn sheteldik fırmada jumys jasadym. 2005-2017 jyldary «Qazyna kredıt» shaǵyn nesıe uıymy» JShS zań bóliminiń basshysy boldym. 2017 jyldan halyqaralyq quqyq qorǵaý ortalyǵynyń kásibı medıatorymyn. Budan basqa qoǵamdyq jáne qaıyrymdylyq qyzmetpen aınalysamyn. Oral qalasy qoǵamdyq keńesiniń múshesi, Qazaqstan halqy BQO assambleıasy analar keńesi tóraıymynyń orynbasary, sondaı-aq «Aıalaǵan alaqan» qoǵamdyq qaıyrymdylyq qorynyń jetekshisimin.
-Qaıyrymdylyq sharalaryn qaı kezden bastap ediń?
-Bireýge jaqsylyq jasaý úshin erekshe qabilettiń keregi joq. Eń bastysy, júrek jylýy qajet. Óz basym qaıyrymdylyqpen 2012 jyldan bastadym. Turmys quryp, ómirge egiz ul ákelgennen keıin oblystyq perınataldyq ortalyqta jattym. Sol kezde anasy bas tartyp, perzenthanada qaldyrǵan jazyqsyz sábılerdi kórdim. Sondaı-aq alys aýyldardan kelgen áıelderde qarapaıym gıgıena quraldary bolmady, men qolda barymmen bólistim. Perzenthanadan shyqqannan keıin barlyq qajetti zattardy jınastyryp, sonda jatqan analar men sábılerge qaıta keldim. Bul ıgilikti iske basqalar qosylyp, bir maqsatqa birikken «Qol ushy» atty eriktiler komandasyn qurdym. Mine, sodan beri bes jyl boıy 500-den astam túrli sharalar uıymdastyrylyp, jetim, múgedek, muqtaj balalarǵa, kóp balaly otbasylarǵa, qarttar men balalar úılerine tek syılyq, kıim-keshek, azyq-túlik tartý etip qana qoımaı kontsertter qoıyldy, merekelik keshter ótkizildi.
Ózim jetekshilik etetin «Aıalaǵan alaqan» qaıyrymdylyq qorynyń negizgi qyzmeti jas talanttardy, sonyń ishinde jetimderdi oqytyp, qabiletin ushtaýǵa, mamandyqtaryn durys tańdaý úshin kásibı baǵdar jumystaryn júrgizýge baǵyttalǵan. Sheberlik dáristerin berip, balalarmen qala kásiporyn-mekemelerinde bolyp, túrli saladaǵy jandardyń qyzmetimen tanysamyz. Árıne, basty maqsat - olardyń boıyna adamı qasıetterdi sińirý, meıirimdilikke, bir-birin syılaı bilýge jeteleý. Adamdar ortaq maqsat jolynda birikse, kóp is tyndyra alady. Mysaly, jetim, kóp balaly, az qamtylǵan otbasylardan shyqqan balalar úshin tegin uıymdastyrylǵan aǵylshyn tili kýrstary sonyń aıqyn dáleli bola alady. Astanadaǵy Helıberı mektebi til úıretý úshin ádistemelik quraldarmen qamtysa, qaladaǵy oqý ortalyqtarynyń biriniń oqytýshylary tegin dáris beredi. Shotlandııalyq Kennı Skea demalys kezinde balalardyń tilin syndyrýǵa járdemdesse, kásipker ıÝrıı Tkalýn tegin oryn taýyp berdi. Sol sekildi «Shańyraq» jasóspirimder úıinde de kýrstar uıymdastyrylyp, onda sán salondarynyń sheberleri manıkıýrge, dızaınǵa úıretedi. Shashtarazǵa, sýret túsire bilýge baýlyp júrgender de barshylyq.
-Osy kezge deıin qandaı tabystarǵa qol jetkizdińiz, aldaǵy josparlaryńyz qandaı?
-Qaıyrymdylyq qyzmetine qosqan úlesim úshin Qazaqstan Prezıdentiniń, Qazaqstan halqy Assambleıasy tóraǵasynyń sol kezdegi orynbasary Eraly Toǵjanov, oblys ákimi Altaı Kólginovtiń alǵyshattarymen marapattaldym. Ótken jyly onynshy márte ótkizilgen qoǵamdyq ulttyq «Altyn júrek» syılyǵynyń «Jetim balalarǵa kórsetken kómegi úshin» atalymy boıynsha laýreaty atandym. On jyl ishinde mundaı ataqqa oblystan qol jetkizgen men ǵana ekenmin. Bul maqtanshylyq emes, qaıta maǵan úlken jaýapkershilik júkteıdi. Sondyqtan qaıyrymdylyq isteriniń jalǵasa beretini anyq.
Jeke hobbıim jóninde aıtsam, ákemniń óleń jazatyn óneri bar, jınaǵyn shyǵardy. Men ony kollektsııalaımyn. Kompozıtorlar án shyǵarady. Bolashaqta ákem úshin óńirdegi óner juldyzdarynyń qatysýymen shyǵarmashylyq keshin ótkizgim keledi. Basqa da arman-maqsattarym bar. Eń bastysy, men Otanymdy, ata-babamnyń qasıetti izi qalǵan týǵan jerimdi jaqsy kóremin. Elbasymyzdyń «Rýhanı jańǵyrý» baǵdarlamasyna sáıkes qolǵa alynyp jatqan jańa jobalarǵa da óz úlesimdi qosqym keledi. Sóz sońynda qaıyrymdylyq sharalaryna belsene qatysyp kele jatqan barlyq múddeles adamdarǵa rızashylyǵymdy bildirgim keledi.
