Adamdar ólimine ákelgen «Tıtan» batıskafy syndy apparattardy sertıfıkattaý usynyldy
ASTANA. QazAqparat – «Tıtan» batıskafynyń jarylysynan keıin sarapshylar osyndaı sanattaǵy súńgýir apparattaryn zańnamalyq túrde retteý kerektigin aıta bastady, dep habardaıdy «QazAqparat» HAA Euronews-ke silteme jasap.
Atlant muhıtynda «Tıtan» batıskafynyń jarylýy osy tektes apparattardy paıdalanýǵa qatysty zańnamany qaıta qaraýǵa sebep bolmaq. Bul turǵyda mamandar osy kólik túri eshqandaı erejede eskerilmegenin alǵa tartyp otyr.
«Muhıttaǵy kemelerdiń saparlary tıisti zańnama talaptary boıynsha rettelgen. Olar portqa kirip, tıisti erejege sáıkes porttan shyǵady. Osy oraıda olar belgili bir elde tirkelip, naqty sanat boıynsha jiktelýi kerek. Biraq úlken kemeden tereń sýǵa túsirilip, tereńdikte júretin súńgýir apparattaryn paıdalaný tártibi rettelmegen», - dedi Kempbell ýnıversıtetiniń professory Salvatore Merkolıano.
OceanGate kompanııasyna tıesili «Tıtan» shaǵyn sýasty apparaty AQSh-tyń qadaǵalaý organdarynda múlde tirkelmegen.
«AQSh-ta 1993 jyly qol qoıylǵan Jolaýshylar kemeleriniń qaýipsizdigi týraly zań bar, sol boıynsha tıisti ereje bar. Eń mańyzdy ereje – súńgýir apparat kommertsııalyq paıdalaný aldynda qaýipsizdikke qatysty sertıfıkattan ótýi kerek», - dedi Vashıngton ýnıversıtetindegi zań mektebiniń professory Tomas Shenebaým.
Atalǵan qaıǵyly oqıǵadan keıin birqatar sarapshy osyndaı apparattardy sertıfıkatsııadan ótkizýdi mindetti talap retinde engizýdi usynyp otyr.
«Meniń oıymsha, eger sertıfıkattaý kompanııalary men erejeleri bolsa, bul súńgýir apparaty egjeı-tegjeıli tekserýden óter edi», - deıdi Salvatore Merkolıano.
«Táýelsiz sertıfıkattaý kompanııasy kez kelgen jolaýshy tasymaldaýdy bastamas buryn kemeni aldyn ala tekserýi kerek. Olar qaýipsizdikke baılanysty zertteý jasap, sonyń ishinde metall sapasyn qaraýy tıis», - dep tolyqtyrdy Tomas Shenebaým.
19 maýsym kúni «Tıtanık» kemesi sýǵa batqan aımaqqa sapar jasaıtyn «Tıtan» súńgýir apparaty Atlant muhıtynda joǵalyp ketken bolatyn. 22 maýsymda AQSh-tyń Jaǵalaý qyzmeti joǵalǵan «Tıtan» batıskafyn izdeý aýmaǵynda qırandylar tabylǵanyn málim etti. Keıin súńgýir apparaty tıesili OceanGate kompanııasy málimdeme jasap, batıskafta bolǵan ekıpaj qaza bolǵanyn habarlady.
Batıskaf bortynda 5 adam boldy: 58 jastaǵy brıtandyq bıznesmen ári zertteýshi Hemısh Hardıng, 48 jastaǵy bıznesmen, pákistandyq Shahzada Davýd pen onyń 19 jastaǵy uly Sýleman, OceanGate kompanııasynyń 61 jastaǵy dırektory Stokton Rash jáne 77 jastaǵy frantsýzdyq zertteýshi Pol-Anrı Narjole.
