Adamdar nege artyq salmaqpen kúresa almaıdy - psıholog jaýaby
PETROPAVL. QazAqparat - Petropavldyq psıholog Dmıtrıı Agapov «QazAqparat» HAA tilshisine keıbir adamdardyń qansha kúsh salsa da, ne úshin artyq semizdikten qutyla almaıtyndyǵyn aıtyp berdi.
Onyń aıtýynsha, aryqtaý úshin tamaqtaný ádetterin ózgertý jáne fızıkalyq belsendilikti arttyrý sııaqty faktorlar mańyzdy ról atqarady.
Psıholog kóptegen adamdardyń salmaq tastaýy úshin dıetologtar men jattyqtyrýshylardyń keńesteri jetip jatyr. Al, basqa sanatqa - durys tamaqtanyp, dene shynyqtyrýmen aınalyssa da, aryqtaı almaıtyndar kiredi. Mundaı jaǵdaıda psıhologııalyq kómek qajet.
«Kóp jaǵdaıda adamdardyń salmaq qosýyna bala kezde tamaq ishýge qoıylǵan shekteý sebep bolady. Men bir áıelmen jumys istedim, ol jasóspirim kezeńinde gormonııalyq ózgeristerge baılanysty kóp salmaq qosqan. Oǵan dıeta usynyp, anasy onyń ratsıonyn qatań qadaǵalap otyrǵan. Áıel osy úshin anasyna renjip, oǵan bildirtpeı tamaq ishkenin esine aldy. Sonyń saldarynan eseıe kele ol áıelde «menen tamaqty alyp qoımaı jatyp, toıǵanymsha jeımin» degen senim qalyptasqan. Bul oı eleginen ótpegen áreket», - dedi psıholog.
Kúıeýimen urysyp qalǵan nemese kúızelisti bastan ótkerip júrgen keıbir áıelderde de osyndaı jaǵdaı bolady.
«Eger qarym-qatynasta qandaı da bir másele bolsa, adam salmaqty beısanaly túrde úreıdi basyp, ózin qaýipsiz seziný úshin salmaq qosa bastaıdy. Olar ózderin aryq kúıde qorǵansyz sezinedi. Mundaı jaǵdaıda psıhologtardyń kómegine júgingen jón», - dedi D. Agapov.
Taǵy bir ózekti másele - anoreksııa.
«Іshki senimsizdik, óz denesin qabyldaı almaý, qoǵamdyq pikirge táýeldilik - anoreksııanyń sebepteri. Munaı jaǵdaı kóbinese tamaq máselesine qatysty týyndap jatady. Óz kemshilikterin qabyldaı almaıtyn adamdar jumysty qıyndatady», - dep atap ótti psıholog.
D.Agapov mundaı aýrýǵa kóbinese jasóspirim qyzdardyń ushyraıtynyn aıtty.
«Ózin, óz denesin súıe bilý mańyzdy. Adamdar ózin súıe bilgende ǵana óz denesine qurmetpen qaraıdy. Barlyq berilgen keńesterdi ózdiginen oryndap, basty qaǵıdany - zııan keltirmeýdi ustanady», - dedi maman.
