Adamdar kómir shahtasynda turady – almatylyqtar ákimnen kómek surady
Túrksib aýdanynyń turǵyny Almaty qalasynyń ákimi Erbolat Dosaevpen kezdesý barysynda kómir qoımasyna qatysty máseleni kóterdi.
«70-shi razezdegi adamdar kómir shahtasynda turady. Olardyń úıinen 20 metr qashyqtyqta eki kómir bazasy ornalasqan. Kómir qoımasyn qala syrtyna kóshirý kerek. Mundaǵy úıdiń barlyǵyna gaz tartylǵan, bizge bul shahtalardyń qajeti joq. Aýdan ákimdigi deńgeıinde bul másele sheshilmeıdi, óıtkeni jerdi olar bergen joq. Bastapqyda olar múlde basqa maqsatty kózdegen. Biz bul máseleni 33 jyldan beri sheshe almaı kelemiz», – deıdi aýdan turǵyny.
Almaty ákimi Erbolat Dosaevtyń aıtýynsha, bul jer jekemenshik.
«Bul jer jekemenshik. Siz úıge gaz tartyldy, endi kómir bazalary kerek emes deısiz. Biraq, ókinishke oraı, qaladaǵy barlyq úıler gazdandyrylǵan joq. Bir jyldyń ishinde qalany tolyǵymen gazdandyrýǵa tyrysamyz. Menshik ıelerimen kelissózder júrgizýge bolady, biraq olar menen jer suraıdy, odan da basqa máseleler bar. Kelissózder protsesin bastaıyq, biraq men tez sheshýge ýáde bermeımin. Olarmen bolashaqta ne qalaıtyndaryn talqylaýǵa tyrysaıyq. Kómir Almaty oblysyna tıesili bolsa, oblys ákimimen sóılesip kómir qoımalaryn basqa jaqqa kóshirtýge tyrysamyz», - dedi Almaty ákimi.
Buǵan deıin «Nomad» turǵyn úı kesheninde turatyn almatylyqtar ákimnen aýyr mashına jasaý zaýytynyń jumysy turǵyndardyń densaýlyǵyna zııanyn tıgizip jatqandyqtan ony qala syrtyna kóshirýdi suraǵan bolatyn.
Sondaı-aq Jetisý aýdanynyń turǵyndary tsement zaýytynyń jumys istegenine narazylyq bildirgen edi.
