Adamdar arasyndaǵy kelispeýshilikke etnosaralyq sıpat berýdiń zańdyq negizi joq - depýtat
NUR-SULTAN. QazAqparat - QR Parlamenti Májilisiniń depýtaty Saýytbek Abdrahmanov Qordaıdaǵy janjalǵa qatysty pikir bildirdi, dep habarlaıdy QazAqparat tilshisi.
«Osydan bir jarym ǵasyrdaı ýaqyt buryn Qytaıda Tsın bıligine qarsylyq kóterilisi ótken. Ol kóterilis aıaýsyzdyqpen basyp-janshylǵan. Kóteriliske shyqqandar musylman dinin ustanǵany úshin qýdalanǵan, qorlanǵan dúngender edi. Aqyry olar qazaq jerine kóship, baýyrmal babalarymyzdan pana tapty. Sodan beri ortaq taǵdyr keship kelemiz. Aldyńǵy jyly biz, Parlament Májilisine Qazaqstan halqy Assambleıasynan saılanǵan bir top depýtattar, Jambyl oblysynyń Qordaı aýdanyna baryp, dúngenderdiń qazaq jerine kóship kelýiniń 140 jyldyǵyna arnalǵan saltanatty is-sharaǵa qatysyp qaıtqan bolatynbyz. Sol joly elimizdegi etnostardyń jarasymdy tirligine taǵy da kóz jetkizgenbiz. Mine, dál sol jerden jan aýyrtatyn jaman habar jetip, júregimiz syzdap tur», - dedi Májilis depýtaty.
Saýytbek Abdrahmanov Qordaı aýdanynyń jekelegen eldi mekenderinde jappaı tóbeles bolyp, onyń aıaǵy adam ólimine ákelip soqtyrǵanyn, úıler órtelip, kólikter qıratylǵanyn atap ótti. Onyń aıtýynsha, qazir oqıǵanyń shyǵý sebepterin, zardaptaryn, naqty kinálilerdi anyqtaıtyn úkimettik komıssııa qurylyp, bul másele Memleket basshysynyń tikeleı baqylaýynda tur.
«Ol oqıǵa qalaı bolsa da, myna jaıdyń basy ashyq: adamdar arasyndaǵy kelispeýshilikke etnostar arasyndaǵy kelispeýshilik sıpatyn berýdiń eshqandaı zańdyq negizi joq jáne bolýy da múmkin emes. Qazaqstan halqynyń ǵasyrlar boıy qalyptasqan dástúrli dostyǵynyń beriktigi daý týǵyzbaıdy. Sonymen birge oryn alǵan olqylyqtarǵa baǵa berýdi, kinálilerdi jazalaýdy jekelegen adamdardyń óz qolyna alýǵa tyrysýynyń da zańsyzdyǵyn basa aıtý kerek. Memlekettegi zańdylyqty saqtaýǵa memlekettiń áleýetti qurylymdary mindetti jáne olar buǵan qabiletti. Ol qurylymdarǵa senimsizdik kórsetýdiń eshqandaı reti kelmeıdi. Sonymen qatar, osyndaı oqys oqıǵalar tusynda otqa maı quıatyndardyń, jerden jeti qoıan tapqandaı alaýlatyp, jalaýlatyp jóneletinderdiń, jurtty jeliktirip jiberetinderdiń kóbeıip ketetini, olardyń áleýmettik jelilerdegi jaýapsyzdyǵy adamdar tragedııasyna sebepker bolatyndyǵy taǵy bar. Tıisti oryndar áleýmettik jelilerge, messendjerlerge monıtorıng jasap, halyqty arandatýshylardy anyqtaýǵa, tıisti quqyqtyq baǵasyn berýge tıis. «Qulaq buzylsa, qulyq buzylady» degendi bizge abyz aǵamyz Ábish Kekilbaev eskertip ketken bolatyn», - dedi Saýytbek Abdrahmanov.
Buǵan deıin Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.
«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.
Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.
