Adamdar áleýmettik jeliler arqyly kóp aldanady - polıtsııa
AQTÓBE. QazAqparat – Adamdar áleýmettik jeliler arqyly kóp aldanyp qalady. Bul týraly № 2 qalalyq polıtsııa bóliminiń anyqtaýshysy Ardaq Muhambetova aıtyp berdi, dep habarlaıdy QazAqparat tilshisi.
Anyqtaýshylardyń mindetine asa aýyr emes jáne aýyrlyǵy ortasha isterdi tergeý kiredi. Negizinen urlyq, buzaqylyq, alaıaqtyq, densaýlyqqa jeńil jaraqat keltirý sekildi qylmystardy ashý anyqtaýshynyń quzyrynda. Osy sanattaǵy qylmystar boıynsha anyqtaýshylar sotqa deıingi tergep tekserý amaldaryn júrgizedi. Anyqtaýshylar úshin istiń anyq-qanyǵyn anyqtaýda qıyndyq týdyratyn qylmystyq ister de bar. Qazirgi kezde ınternet jelisindegi alaıaqtyq kóbeıdi. Zamanýı tehnologııalardyń kómegimen jasalatyn qylmystyq isterdi tergeýde de biraz kedergi bar.
«Biz qazir E-qylmystyq ister jobasyn engizip jatyrmyz. Birinshiden, ýaqyt únemdeıdi. Ekinshiden, bári ashyq bolady. Anyqtaýshy birneshe qylmystyq isti tergeýmen aınalysady. Árbir istiń artynda adam taǵdyry turady.Biz qylmystyq isti aıaǵyna deıin tergep, isti sotqa deıingi biryńǵaı reestrge tirkeımiz. Sońǵy ýaqytta ınternet-alaıaqtyq beleń alyp keledi. Adamdar áleýmettik jelilerdi alaıaqtyqtyń alańyna aınaldyryp alyp jatyr. Osy áleýmettik jelide tehnıka, ton, qosalqy bólshekter, kıim-keshekter satatyn feık akkaýnttar kóp. Olardyń áreket etý shemasy belgili. Satyp alýshydan aldyn ala aqsha aýdarýyn suraıdy, keıin aldap ketedi. Mundaı faktiler sońǵy kezderi jıilegen. Biz ınternet-alaıaqtyqtyń aldyn alý úshin azamattarǵa túsindirý jumystaryn júrgizemiz. Soǵan qaramastan tekserilmegen ınternet dúkenderdiń qyzmetine júginetinder kóp», - dedi № 2 qalalyq polıtsııa bóliminiń anyqtaýshysy Ardaq Muhambetova.
Onyń anyqtaýshy qyzmetke kelgenine bil jyl boldy. Mamandyǵyn tereń meńgere túsken polıtsııa qyzmetkeri psıhologııany da úırenip alǵan.
«Máselen, jas jigit qumar oıynǵa áýestenip, bás tikken. Ajarly, ózine senimdi jigit qyzdarmen ońaı tanysyp, »unatamyn« dep aldap, senimderine kirip, keıin qymbat zattaryn, altyn buıymdaryn, úılerindegi baǵaly zattaryn alyp, ony lombardka ótkizip, túsken aqshany oıynǵa salyp otyrǵan. Sol jigitke úsh boıjetkennen shaǵym tústi. Shyǵyndaryn ótegesin, keshirim berdi. Biraq osyndaı alaıaq jigitterge aldanyp qalmaý úshin boıjetkenderdiń sezim jeteginde ketpeı, tanysqan adamnyń syryn bilip alǵandary jón dep oılaımyn. Qazir kóbinese mobıldi qosymshadaǵy taksı qyzmetine habarlasyp, dúkennen azyq-túlik aldaryp jáne »úıge kelgen soń berem« dep aldap, kıvı ámııanǵa aqsha saldyrtyp, aldap ketetin alaıaqtar kóbeıgen. Sonymen qatar »páter jóndeımiz« dep tapsyrys berýshiden aqshasyn aldyn ala alyp, jumysty talapqa saı jasamaıtyndar da kezdesedi. Árıne anyqtaýshy bolǵasyn ómirdegi túrli taǵdyrlar men quqyqbuzýshylyqtardy kóresiń», - dedi anyqtaýshy.
Ardaq Muhambetova eńbek jolyn jasósipirimder isi jónindegi mektep ınspektory bolyp bastap, bir jyldan soń anyqtaýshy qyzmetinge aýysty. Ol óz mamandyǵyn jaqsy kóredi. Ári ádil sheshim qabyldaı bilý, adamdarǵa kómektesý eń basty paryzym dep sanaıdy.
