Adambaevtyń «Taraz» fılmi Los-Andjelestegi baıqaýda júldege ıe boldy
ASTANA. QazAqparat - Qazaqstandyq prodıýser, rejısser jáne ártis Nurtas Adambaevtyń «Taraz» fılmi AQSh-tyń Los-Andjeles qalasynda ótken Genre Celebration Film Festival baıqaýynda eki atalymda jeńimpaz atandy.
«Úzdik dramalyq fılm» jáne «Úzdik operatorlyq jumys»! Men úshin bul óte mańyzdy jeńis ekenin moıyndaımyn, óıtkeni bul kúrdeli janrda túsirgen alǵashqy fılmim. Osy fılmdi túsirýge atsalysqandardyń barlyǵyna jáne qoldaý kórsetkenderge, senim bildirgenderge alǵys aıtamyn! «Taraz» alǵashqy baıqaýynda birden júldege qol jetkizdi! Qarasha aıynda júlde tabystaý saltanatyna ushyp baryp qaıtamyn!», - dep jazdy Nurtas Adambaev óziniń Feısbýktegi paraqshasynda.
Eske sala ketsek, kınokartına Genre Celebration Film Festival baıqaýynan basqa San Francisco International New Concept Film Festival (AQSh), Hamilton Film Festival and Canadian Film Market (Kanada), Gallup Film Festival (AQSh), Princeton Independent Film Festival (AQSh), Festival Internacional de Cine de Autor (Meksıka) festıvalderine qatysqan.
Krımınaldyq-áleýmettik dramaǵa Adambaevtyń ózinen basqa Erkebulan Daıyrov, Asan Májıt, Gúlnaz Jolanova, Tólepbergen Baısaqalov, Jandos Aıbasov, Kámshat Joldybaeva, Nurjan Sadybekov, Marat Abdýllaev, Áshim Ahmetovtar túsken.
Fılmniń premerasy elimizdegi barlyq kınoteatrlardan 13 qazanda kórsetile bastaıdy.
