Adam jegish Jumaǵalıev týraly fılm jaryq kórdi
ALMATY. QazAqparat - Adam jegish Nıkolaı Jumaǵalıev týraly «Úsh» atty fılm kórermenge jol tartty, dep habarlaıdy QazAqparat tilshisi.
Fılmniń rejısseri Rýslan Pak. Ol Ońtústik Koreıada turady. «Úsh» onyń Qazaqstanda túsirgisi kelgen ekinshi tolyqmetrajdy fılmi.
«Men bala kúnimde fılmdegi basty keıipker manıak Jumaǵalıev týraly jıi estidim. Jaqynda men osy qylmyskerdi ustaý operatsııasyn basqarǵan adamdy kezdestirdim. Men odan kóptegen jaǵa ustarlyq málimetterdi estip, bildim. Bul kınematografııalyq oqıǵa ekenin túsindim», - dedi Rýslan Pak.
Týyndyda tutas Keńes úkimetin úreı qushaǵynda ustaǵan qanisherdiń jaǵa ustatar qylmystary kórsetiledi. Tipti avtorlar jurtty dúr silkindirgen istiń el bile bermeıtin derekterin de týyndyǵa qosqan. Fılmniń stsenarıi 80-jyldary bolǵan jantúrshiktirer oqıǵalarǵa negizdelgen.
Týyndyda mılıtsııanyń arnaıy bólimshesine tájirbıeden ótýge kelgen Sadyqovtyń ómiri baıandalady. Jumysqa kirisken alǵashqy kúnnen-aq jas tergeýshi qandy qylmystardy ashýmen aınalysatyn topqa ilesip, buryn-sońdy kórmegen sumdyqtardyń kýá bolady.
« Fılmde órimdeı qyzdardyń janyn alyp, qanyn iship, etin jegen atyshýly Nıkolaı Jumaǵalıevtiń qylmystary kórsetiledi. Tártip saqshylary úıin tintý kezinde bólshektelgen adamdardyń máıitin tabady. Alaıda qanypezerdiń ózi qashyp qutylyp ketedi. Manıaktyń kelesi qurbany – Sadyqovtyń úlken ápkesi bolady. Sadyqov úshin manıakty ustaý qyzmettik paryzy ǵana emes, jeke kek alýǵa aınalady»,- deıdi rejısser.
Fılmde basty rólderdi Asqar Іlııasov, Samal Eslıamova, Erjan Túsipov, Nurjan Sadybekov jáne reseılik akter Igor Savochkın somdaıdy.
«Men akterlerdiń beınesine qarap, irikteýden ótkizdim. Olarmen kórisip, sóılesip, kimniń qandaı obrazǵa saı keletinine baılanysty tańdadym. Biz fılmdi bir aıdyń ishinde 24 túsirilim kúninde bitirdik. Mundaı úlken kólemdegi týyndyǵa bul óte az ýaqyt. Sebebi, túsirilim toby úılesimdi jumys istep, barlyǵy jeńil túsirildi», – deıdi fılmniń rejısseri Rýslan Pak.
Fılm osydan úsh jyl buryn Almatyda túsirilip, bir jyldan keıin Pýsandaǵy halyqaralyq kınofestıvalde arnaıy syılyqpen marapattaldy.
Qazaqstandaǵy premeradan keıin «Úsh» fılmi Koreıada keń prokatqa shyǵady.
