«Adam turý múmkin emes»: jupyny úıdi panalaǵan qazalylyq otbasyǵa qandaı kómek kórsetiledi
QYZYLORDA. KAZINFORM — Áleýmettik jelide Qyzylorda oblysynyń Qazaly aýdanynda bir otbasynyń qabyrǵasy qaýsap, surqy qashqan úıde turyp jatqany týraly beınejazba tarady.
Beınejazbadan ol úıde adam turý úshin eshqandaı qolaıly jaǵdaı joqtyǵyn baıqaýǵa bolady. Talaı jyldan beri jóndeý júrgizilmegen. Aýdan ákimi Almasbek Esmahanov Kazinform tilshisiniń turmystyń taýqymetin tartyp otyrǵan otbasyǵa qandaı qoldaý kórsetiletini týraly suraǵyna jaýap berdi.
— Áleýmettik jelilerdegi paraqshamdy ózim júrgizemin. Turǵyndar tarapynan kelip túsken suraqtarǵa múmkindiginshe jaýap berýge tyrysamyn. Maǵan bul otbasynyń qıyn jaǵdaıda qalǵany jóninde Instagram arqyly turǵyndardyń biri jazdy. Dereý orynbasarymdy shaqyryp, kent ákimimen birge baryp, máseleni zertteýdi, qandaı kómek kerek ekenin bilýdi tapsyrdym, — dedi ol.
Alaıda úı ıeleri ýaqytsha baspana men medıtsınalyq kómekten bas tartqan. Sonda da keıýana men ulyna jergilikti ákimdik qoldan kelgenshe kómektesip jatyr.
— Apamyz ben baýyrymyzdyń densaýlyǵyna qatysty qorytyndyny medıtsınalyq mekeme beredi. Al biz úıin jóndep beremiz. Іshin áktep-syrlap, plastık tereze saldyryp, edenin aldyryp, beton quıyp, lınoleým tósep, qalypqa keltirip beremiz. Bul kisiler — negizi Qazalynyń turǵyndary. Biraq meken-jaıy Tóretam kentinde tirkelgen. Mamandar tıisti medıtsınalyq qyzmet kórsetý úshin Qazaly aýdanyna aýystyrý baǵytynda jumys júrgizip jatyr. Qaıtken kúnde de qaıyrymdy bolyp, olardy dalada qaldyrmaýymyz kerek, — dedi aýdan ákimi.
Qazaly aýdanynyń ákimi Almasbek Esmahanov buǵan deıin Qazaly aýdanyndaǵy Qazaly-Qojabaqy-Bozkól-Káýkeı avtomobıl jolynyń 16-shaqyrymyndaǵy Qarlań ýchaskesinde temir betondy kópir qurylysy qashan aıaqtalatynyn aıtqan bolatyn.