Adam tiri kezinde donorlyqqa kelispese, aǵzalardy alýǵa tyıym salynady
NUR-SULTAN. QazAqparat – Búgin Parlament Májilisiniń jalpy otyrysynda ekinshi oqylymda maquldanǵan «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń jobasynda transplantologııa máselelerin retteıtin normalar pysyqtaldy, dep habarlaıdy QazAqparat tilshisi.
Atap aıtqanda, Áleýmettik-mádenı damý komıtetiniń qujat boıynsha qorytyndysyna sáıkes, Májilis naqty shekteý maqsatynda «tiri donor», «qaıtys bolǵan donor», «yqtımal retsıpıent» uǵymdary engizildi.
«Qaıtys bolǵan donordan aǵzalar men tinderdi alý tártibin retteıtin túzetýler engizildi. Máselen, donor bolýǵa óziniń kelispeıtindigi týraly tiri kezinde erik bildirýi bolǵan kezde, aǵzalardy alý múmkin emes ekendigi kózdeldi. Eger mundaı ótinish qaıtys bolǵannan keıin bolmasa, onda onyń aǵzalaryn alý tek jubaıynyń (zaıybynyń) jazbasha kelisimimen, al ol bolmaǵan kezde jaqyn týystarynyń kelisimimen ǵana júzege asyrylýy múmkin», - delingen qorytyndyda.
Sondaı-aq, mundaı kelisimniń qajettiligin patologııalyq anatomııalyq operatsııaǵa qatysty da belgileý usynyldy. Bul rette patologııalyq anatomııalyq operatsııa mindetti bolyp tabylatyn jaǵdaılardyń tizbesi úshke deıin qysqartyldy: óli týý, ana men bala ólimi.
«Sheteldik azamattardyń muqtajdyqtary úshin Qazaqstannan aǵzalar men tinderdi áketý múmkindigi alyp tastaldy. Depýtattar aǵzalardy shetelderde medıtsınalyq kómek alatyn Qazaqstan Respýblıkasynyń azamattary úshin ǵana áketýdi usyndy», - dep atalyp ótken taratylǵan málimette.
Budan bólek, anatomııalyq syı máselelerin retteıtin bap aıtarlyqtaı pysyqtaldy. Depýtattar anatomııalyq syı retinde jeke basy anyqtalǵan, medıtsınalyq uıymda qaıtys bolǵandar jáne jerleý úshin 10 kúnniń ornyna 20 kún ishinde suraýy bolmaǵandar ǵana tanylýy múmkin dep belgileýdi usyndy. Bul rette tanylmaǵan máıitter anatomııalyq syı retinde berilmeıdi.
