Adam terisiniń qartaıýyn jedeldetetin mıkroflora mıkrobtary anyqtaldy
Amerıkalyq jáne frantsýzdyq molekýla bıologtary teriniń qartaıý jyldamdyǵy men ájim túsýine teri qabatynyń mıkroflora quramy men onda Staphylococcus, Kocuria, Peptostreptococcus jáne Lysobacter syndy bakterııalardyń bar ekeni áser etetinin anyqtady. Kazinform bul týraly TASS-qa silteme jasap habarlaıdy.
- Teriniń qartaıýy belgileri, onyń ishinde ájim men kóz qıyǵyndaǵy ájimderge baılanysty bıomarkerlerdi anyqtaýda úlken jańalyq ashtyq. Ol densaýlyq pen terini jaqsartýǵa baǵyttalǵan tásilderdi jasaýdy jedeldetedi, - dep málim etti L'Oreal kompanııasy Zertteý ortalyǵynyń ǵylymı qyzmetkeri Chjen Tsıan.
Onyń sózin San-Dıegodaǵy Kalıfornııa ýnıversıtetiniń (UCSD) baspasóz qyzmeti keltirdi.
Chjen Tsıan men basqa da mamandar mıkroflora quramynyń teri men onyń qartaıýyna áserin zertteý boıynsha eksperımentke qatysýǵa kelisken 18-70 jas aralyǵynda 650 erikti áıelge zertteý júrgizip, osyndaı sheshimge keldi. Zertteýge Frantsııa men AQSh turǵyndary ǵana emes, Mavrıkıı araly, Sıngapýr, Japonııa men Qytaıda turatyn áıelder de qatysty.
Osy eksperıment aıasynda ǵalymdar tájirıbege qatysqan áıelderdiń báriniń bet terisiniń qandaı jaǵdaıda ekenin zerttep, ony mıkroflora erekshelikterimen salystyrdy. Salystyrý mıkroflora erekshelikteri men teriniń qartaıý sıpatynda shynynda baılanys bar ekenin anyqtap, teri qurǵaqtyǵy, ájim men qartaıýdyń basqa da belgileri men mıkrobtardyń áralýandyǵy jáne túr quramy arasyndaǵy baılanysqa qatysty zańdylyqty ashty.
Sonymen, Chjen Tsıan jáne basqa sarapshylar teri mıkroflorasynyń túrlik áralýandyǵy adamnyń jasyna qaraı birtindep ósetinin, sonymen qatar onyń quramynda kóptegen mıkrobtyń bolýy teriniń joǵarǵy qabatynan sýdyń baıaý joǵalýyna baılanysty ekenin anyqtady. Buǵan qosa, zertteýshiler teriniń qartaıý jyldamdyǵyna jáne kózdiń buryshynda ájimderdiń paıda bolýyna aıtarlyqtaı áser etetin bakterııalardyń birneshe túrin tapty.
Atap aıtqanda, Staphylococcus, Kocuria, Peptostreptococcus jáne Lysobacter syndy bakterııalar kóp bolǵan adamdarda ózi qatarlas basqa adamdarmen salystyrǵanda ájimder az bolǵan, al brevibacterium jáne Kaistella tuqymdas basqa mıkrobtar artyq bolǵanda kerisinshe, teri qartaıýy men ájimderdiń túsýi tezirek júrgen. Ǵalymdardyń pikirinshe, osyny túsiný arqyly mıkrofloranyń quramyn eskere otyryp, teriniń qartaıýyn baıaýlatatyn tásilderdi jasaýǵa bolady.
