Adam terisinen jasalǵan kitap elordadaǵy kórmege qoıylady
NUR-SULTAN. QazAqparat - 2019 jyldyń 24-27 sáýirinde «Kórme» ortalyǵynda «Eurasian Book Fair-2019» kezekti Eýrazııalyq halyqaralyq kitap jármeńkesi ótedi, dep habarlaıdy QazAqparat tilshisi.
Kórme-jármeńkege alys jáne jaqyn shet elderden - Reseı, Ázerbaıjan, Tájikstan, Armenııa, Qyrǵyzstan, Túrkııa, Qytaı, Iran, Polsha, Belgııa, Latvııa, Ýkraına jáne Ózbekstan syndy 13 memleketten 90 kompanııa qatysady. Kitaptarmen birge atalǵan kórmege sırek kezdesetin qoljazbalar da qoıylmaq.
«Qazirgi ýaqytta Ulttyq akademııalyq kitaphanada 13 myńnan astam sırek kitaptar men qoljazbalar saqtaýly. Qorymyzdyń eń úzdik eksponattarynyń biri - 1532 jyly kórsetilgen eski latyn qarpinde jazylǵan qoljazba. Bul kitaptyń muqabasy adam terisinen jasalǵan, sondyqtan kórmege kelýshilerdiń barlyǵy osy kitapqa qyzyǵýshylyq tanytyp otyr. Kórmede atyshýly kitaptyń qasyna kúzet qoıylady», - dedi Ulttyq akademııalyq kitaphana dırektory Úmithan Dáýrenbekqyzy Ortalyq kommýnıkatsııalar qyzmetinde ótken baspasóz máslıhatynda.
Sonymen birge, sırek kezdesetin kitaptar arasynda Parsy, Úndistan, Qytaı jáne Japonııanyń túpnusqa eńbekterinen alynǵan 1735 jyly shyǵarylǵan qytaı oıshyldarynyń kitaby bar.
«Bul kitap úsh danada jaryq kórdi, olardyń biri Lývrde, ekinshisi - Qazaqstanda saqtalsa, úshinshi - belgisiz oqyrmannyń qolynda», - dedi ol.
Aıta keteıik, jyl saıyn Halyqaralyq kitap jármeńkesi kitaptardy nasıhattaý, qatysýshy elderdiń ádebı muralaryn damytý jáne oqý mádenıetin qalyptastyrý maqsatynda ótedi. Kórme aıasynda 150-den astam is-shara uıymdastyrylmaq. Kórme kelýshilerine ádebı ekskýrsııalar, jumbaq poetıkalyq marshrýttar, avtorlarmen, baspagerlermen, sýretshilermen kezdesýler uıymdastyrylady.
