Adam ózin qaýipsiz sezine alsa, ol — quqyqtyq memlekettiń ıgiligi
PAVLODAR. KAZINFORM — Adam úıinen tysqary jerde ózin qaýipsiz sezine alsa, ol elde quqyqtyq tártip ornyqqan degendi bildirse kerek. Otandyq polıtsııa shebinde on jyldan astam qyzmet atqaryp kele jatqan Azamat Kúrkebaev óziniń mıssııasyna adal qaraıtyn azamattyń biri.
Bylaı qarasańyz, polıtsııanyń mindeti kóp, sharýasy shash-etekten. Ýchaskelik polıtsııadan bastap, keńsede otyratyn bastyqtarynyń ózi únemi shapqylap júredi. Ásirese jergilikti polıtsııa qyzmetiniń jumysy kúrdeli. Qoǵam men jol qaýipsizdigine qatysty barlyq profılaktıkalyq is-shara, oqıǵalar men qylmystyq isterge jaýapty. Ertis-Baıan óńirindegi osy bir tolassyz tirlikti uıymdastyryp, úılestirý oblystyq jergilikti polıtsııa qyzmeti bastyǵynyń mindetin atqarýshy, polıtsııa maıory Azamat Kúrkebaevtyń enshisinde. Eńbek joly qatardaǵy ýchaskelik polıtseıden bastalǵan tártip saqshysy alǵyrlyǵy, qyzmetine degen adaldyǵynyń nátıjesinde búginde bútin bir oblystyń qoǵamdyq tártibin qadaǵalap otyr.
— Ár polıtseıdiń mindeti — antyna adal bolý, Otanyna qyzmet etý. Ádette qatardaǵy polıtseılerdiń qyzmeti shym-shytyryqqa toly. Sebebi bul jerde jurtpen etene jumys isteısiń. Sonysymen de qyzyq. Qaýipti qubylystardyń, yqtımal qylmystardyń aldyn alýǵa umtylasyń. Bylaıǵy kópshilik bile bermes, qoǵamda tártip saqshylarynyń qatysýymen kúnine júzdegen qylmystyń aldy alynady. Elimizde jasóspirimder arasyndaǵy qylmys, turmystaǵy zorlyq-zombylyq, jol-kólik oqıǵalarynyń ósýi sııaqty máseleler údep turǵany shyndyq. Biraq munyń barlyǵy zamanaýı órkenıetti elderdiń barlyǵyna tán qubylys ekenin umytpaýymyz kerek. Qoǵam tártibin qadaǵalaý, qylmystyń aldyn alý, jurtty zańǵa baǵynýǵa úıretý kún tártibinen túspeıdi, — deıdi ol.
«Ákege qarap ul óser» demekshi, Azamat Maratjanuly jaqsy ákeniń tálimin alǵan jan. Ata-anasy balalarynyń barlyǵyn oqytyp, adal eńbekke úıretkenin, al polıtseı mamandyǵyn tańdaýyna naǵashy jurtynda buryn ishki ister salasynyń qyzmetkerleri bolǵany sebepker ekenin jetkizdi. Ákesi úıde tártipti únemi alǵa qoıǵannan ba, uly kishkentaıynan tártipsúıgish bolyp jetilgen. Óse kele mamandyqqa adal bolýdyń negizgi faktory da tártipke baǵyný ekenin uqqandaı.
— Polıtseıler — tártiptiń etalony bolýy kerek. Bul qaǵıda ǵana emes, adamnyń ishki jan-dúnıesimen baılanysyp jatatyn oı-óris. Іshi ister salasynda eńbek etip júrgen azamattar psıhologııalyq turǵydan myǵym bolmasa, uzaqqa shydamaıdy, tolassyz tirlikten «kúıip ketedi». Oǵan talaı márte kýá boldyq. Al jyldar boıy jınaǵan tájirıbe bizdi damytyp qana qoımaıdy, jurtpen jumys isteýde jańashyldyqtar engizýge túrtki bolady. Pavlodar oblysy — elimizdegi eń qaýipsiz óńirdiń biri dep maqtanyshpen aıtýǵa laıyqty. Kópshilik táýliktiń kez kelgen ýaqytynda Ertis ózeni jaǵasynda, kósheler men saıabaqtarda emin-erkin serýendep, ózin qaýipsiz sezine alady. Mundaı qaýipsiz atmosferany ustap turýǵa polıtseıler kún saıyn tynymsyz eńbek etip júr. Negizi barlyǵy aldyn alý, ıaǵnı profılaktıkalyq is-sharalardan bastalatynyn umytpaýymyz da kerek. Bul baǵytqa bizdiń oblysta basa mán beriledi, — dep áńgimesin jalǵaı tústi.
Azamat Kúrkebaev Ekibastuzda ýchaskelik polıtseı, vzvod, rota komandıri bolyp eńbek etip júrgen shaǵynda alǵy qatardaǵy qyzmetkerlerdiń biri bolǵanyn da atap ótpeske bolmas. Ásirese, kóshede meıirbıke áıeldiń qolsómkesin urlap qashqan tonaýshyny 10 mınýt ishinde ustap, qylmysty izin sýytpaı ashqany týraly aqparat bir jyldary áleýmettik jelide tanymal bolǵan. Jol qaýipsizdigine qaýip tóndirgen mas júrgizýshilerdiń talaıyn quryqtap, balkonnan sekirgeli turǵan azamattardy qutqaryp qaldy.
Sóz sońynda Іshki ister mınıstrligi jergilikti polıtsııa qyzmeti men ákimshilik polıtsııa basqarmasyn qaıta uıymdastyryp, olardyń bazasynda eki jańa basqarma — quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý basqarmalaryn qurǵaly otyrǵanyn oń bastama retinde qoldaıtynyn jetkizdi.
— Adamdar erejelerdi saqtap, tártipke baǵynsa, kólik júrgizýshileri qaýipsizdik belbeýin taǵyp, jyldamdyqty asyrmasa tártiptiń saqtalýy degen sol, ıaǵnı, kez kelgen quqyq buzýshylyqtyń aldyn alý úshin qoǵamdaǵy tártiptik sanany kúsheıtýge mán berýimiz kerek. Aldyn alý is-sharalarynyń mańyzy da soǵan saıady. Adam kez kelgen ortada ózin qaýipsiz sezine alsa, ol — quqyqtyq memlekettiń ıgiligi, — dep támamdady sózin.
Azamat Maratjanuly búginde zaıyby ekeýi otbasynda bir ul, bir qyz bala tárbıelep otyr.
Aıta keteıik, búgin — polıtsııa kúni. Azamattardyń qaýipsizdigin kúzetken jandardyń eńbegi eren. Kazinform agenttigi tártip saqshylarynyń kúndelikti qyzmetine sholý jasaǵan edi.