Adam saýdasynyń jolyn kesýge baǵyttalǵan 2 jyldyq keshendi jospar bekitilmek

ASTANA. QazAqparat – El Úkimeti Adam saýdasyna baılanysty qylmystyń profılaktıkasy, aldyn alý jáne oǵan qarsy kúres jónindegi 2024-2026 jyldarǵa arnalǵan is-sharalar josparyn bekitpek, dep habarlaıdy QazAqparat tilshisi.

Ashyq NQA portalynda qujatta jazylǵandaı aldaǵy 2 jylda myna jumystar atqarylady:

- adam saýdasymen aınalysatyndardan qylmystyq jolmen alynǵan, onyń ishinde memlekettik shekaralar arqyly ótkiziletin kiristerdi anyqtaý, qadaǵalaý, tárkileý;

- jalǵan pasport, vıza jáne ózge de qujattardyń zańsyz daıyndalýyn jáne aınalymyn anyqtaý, jolyn kesý jáne tergeý;

- qurylys obektilerinde, sharýa qojalyqtarynda májbúrli eńbekti, maqta alqaptarynda, temeki plantatsııalarynda balalar eńbegin paıdalanýdy boldyrmaý;

- jezókshelikpen jáne jeńgetaılyqpen aınalysý úshin, onyń ishinde AITV (adamnyń ımmýn tapshylyǵy vırýsy) juqtyrǵan adamdardyń aldyn alý jáne anyqtaý úshin densaýlyq saqtaý organdary men JITS-ortalyqtaryn tarta otyryp, prıtondar uıymdastyrýdyń nemese ustaýdy boldyrmaý;

- ınternet jelisindegi pornografııalyq saıttardy anyqtaý jáne joıý. Internet jelisindegi pornografııalyq sıpattaǵy pornografııalyq materıaldardy zańsyz daıyndaýǵa jáne olardyń aınalymyna qatysy bar adamdardyń quqyqqa qarsy qyzmetin anyqtaý, jolyn kesý jáne tergeý;

- adam saýdasymen baılanysty qylmystyq isterdi sotqa deıingi tergep-tekserýdi taldaý, onyń ishinde praktıkany jaqsartý boıynsha naqty usynymdar ázirleý;

- «Kıbernadzor» aqparattyq júıesi arqyly nemese sot tártibimen tekserý jáne keıinnen buǵattaý maqsatynda adam saýdasymen, jańa týǵan balalarmen, adam organdarymen baılanysty BAQ pen ınternettegi, sol sııaqty osyndaı qyzmetterge suranys týǵyzatyn jarnamalyq habarlandyrýlar men aqparattyq materıaldarǵa qatysty monıtorıng júrgizý jáne quzyretti organdar arasynda derektermen almasý;

- adam saýdasymen baılanysty qylmystar boıynsha jábirlenýshilerge «Ótemaqy qorynan» keltirilgen zııannyń ornyn toltyrý tıimdiligin taldaý;

- adam saýdasyna qarsy is-qımyl máseleleri boıynsha senim telefondary, jedel jeliler jumystaryn uıymdastyrý jáne jetildirý;

- Vedomstvolyq oqý oryndaryn, ǵylymı toptardy, táýelsiz sarapshylar men azamattyq qoǵamdy tarta otyryp, adam saýdasynyń nysandary boıynsha keshendi ǵylymı zertteýler júrgizý.

Qolǵa alynatyn jumystar týraly tolyq aqpartty myna silteme boıynsha ótip, kórýge bolady.

Keshendi jospardy bekitýge baǵyttalǵan Úkimet qaýlysynyń-jobasy 31 shildege deıin kópshilik talqylaýda bolady. Keıin qol qoıý úshin Premer-Mınıstrge joldanady.