Adam saýdasyna qatysty 133 qylmystyq is tergelip jatyr - ІІM

NUR-SULTAN. QazAqparat – Adam saýdasyna qatysty 133 qylmystyq is tergelip jatyr. Bul týraly QR Іshki ister mınıstrligi Tergeý departamentiniń basshysy Sanjar Ádilov málim etti, dep habarlaıdy QazAqparat tilshisi.

«Adam saýdasyna qarsy is-qımyl qadamdary ishki ister organdary úshin únemi ózekti. Sebebi bul problema azamattardyń quqyǵy men bostandyǵyna nuqsan keltiredi. Bul baǵyttaǵy jumystar mınıstrlik basshylyǵynyń turaqty baqylaýynda turǵanyn atap ótken jón. Qazirgi kezde ishki ister organdarynyń qyzmetkerleri atalǵan quqyq buzýshylyq boıynsha 133 qylmystyq isti tergep jatyr. Qylmystyq jaýapkershilikke 48 adam tartylyp jatyr», - dedi S. Ádilov onlaın rejımdegi brıfıngide.

Budan buryn habarlanǵandaı, brıfıng barysynda ІІM baspasóz qyzmetiniń ókili Shuǵyla Turlybek ótken bir apta ishinde elimizde 2 862 qylmys jasalǵanyn, onyń 1 982-si táýlik ishinde ashylǵanyn aıtty.