Adam saýdasyna qarsy turý máselesinde EQYU-ǵa qatysýshy elderdiń quqyq qorǵaý organdary ózara is-qımyldy kúsheıtýi qajet

Bul pikirdi búgin elordada ótip jatqan EQYU Sammıti qarsańyndaǵy Sholý konferentsııasynyń «Mıgranttarǵa qatysty tózimsizdik» sessııasynda sóz alǵan QR Prezıdenti janyndaǵy Adam quqyǵy jónindegi komıssııanyń múshesi Gúlzı Nábı bildirdi.

«Sonymen qatar júıeli jáne turaqty túrde adam saýdasynyń qurbandarynyń quqyqtaryn qorǵaýdyń birlesken tetikterin ázirleý qajet», - dedi ol.

Onyń atap ótýinshe, qazirgi ýaqytta álemde adam saýdasy máselesi óte ótkir kóterilip otyr. Óıtkeni bul jasyryn másele jáne de tipti saýdaǵa ushyraǵan adamdar, ásirese balalar ony jete túsine bermeıdi.

«Eresekterge qaraǵanda balalar psıhologııalyq jáne materıaldyq turǵyda álsizdik tanytady», - dedi G.Nábı.