Adam saýdasymen kúres tıimdiligin arttyrý úshin bul qylmys túrin asa qaýipti ári tıimsiz etý kerek - konferentsııa
ASTANA. 6 qazan. QazAqparat /Aıdar Ospanalıev/ - Serbııa prokýrorlary qaýymdastyǵynyń ókili Marın Matıchtiń pikirinshe, adam saýdasy kirisi óte joǵary qylmystardyń birinen sanalady. Sondyqtan onymen kúres tıimdiligin arttyrý úshin bul qylmys túrin asa qaýipti ári tıimsiz etý kerek. Bul pikirin qaýymdastyq ókili búgin elordadaǵy «Rıksos» qonaq úıinde ótip jatqan Shyǵys Eýropa jáne Ortalyq Azııa elderine arnalǵan prokýrorlardyń halyqaralyq qaýymdastyǵynyń 6-shy óńirlik konferentsııasy barysynda bildirdi.
Onyń sózine qaraǵanda, kóptegen memleketterdiń prokýratýra qyzmetkerleri azamattardy adam saýdasynan qalaı qorǵaý qajettigin biledi jáne onyń qajettigin jaqsy sezinedi. «Bul rette biz úshin
eń kúrdeli másele - balalardyń da adam saýdasynyń nysanyna aınalýy. Serbııadaǵy adam saýdasynan zardap shekkender máselesimen aılanysatyn úkimettik emes uıymnyń málimetterinshe, 2001-2010 jyldar aralyǵynda Serbııada 12 myń 500 adam kómek surap kelgen. Sondaı-aq osy ýaqyt aralyǵynda adam saýdasynan zardap shekken 360 adam anyqtaldy»,-dedi qaýymdastyq ókili.
Onyń aıtýynsha, búginde Serbııada adam saýdasynyń qurbanyna aınalǵandardyń 38 paıyzy - balalar.
