Adam saýdasymen aınalysatyn qylmystyq toptyń toryna túsken 7 qazaqstandyq bosatyldy - E.Ydyrysov
ASTANA. QazAqparat - Adam saýdasymen aınalysatyn qylmystyq toptyń toryna túsken 7 qazaqstandyq bosatyldy. Bul týraly búgin QR Prezıdenti janyndaǵy OKK-de ótken brıfıngte QR Syrtqy ister mınıstri Erlan Ydyrysov málim etti.
«Bizdi konsýldarymyz azamattarymyzǵa belsendi qoldaý kórsetip, múddelerin qorǵap keledi. Mysaldar da jetkilikti. Ótken jazda bizdiń konsýldarymyz týrıstik agenttiktiń bankrotqa ushyraýyna baılanysty Túrkııadan 500 qazaqstandyqtyń elge qaıtýyna kómektesti. Olardyń kúsh-jigeriniń arqasynda adam saýdasymen aınalysatyn qylmystyq toptyń toryna túsken Qazaqstannyń 5 azamaty Bahreınnen jáne 2 azamatymyz Lıvııadan qaıtaryldy», - dedi E.Ydyrysov.
Sonymen qatar, ol elimizdiń dıplomatııalyq qyzmeti shetelde qaıǵyly jaǵdaıǵa dýshar bolǵan azamattarǵa da kómek berip otyratyndyǵyn basa aıtty.
«Ózderińizde biletindeı, bizdiń azamattarymyz jazda Frantsııada oryn alǵan áýe apatynda qaza bolǵan edi. Onyń ishinde Imanqulovtardyń otbasy bolǵan edi. Biz olardyń jaqyndaryna kómek kórsettik. Mundaı mysaldar jetkilikti»,- dedi mınıstr.
