Adam saýdasy: Jyl basynan beri 110 qylmys jasaldy

ASTANA. QazAqparat – Resmı statatıskaǵa sáıkes jyl bastalǵaly elimizde 110 qylmys anyqtaldy. Bul týraly Bas prokýratýra janyndaǵy quqyq qorǵaý organdary akademııasy rektorynyń mindetin atqarýshy Qalıolla Seıtenov málim etti, dep habarlaıdy QazAqparat tilshisi.

«Adam saýdasy máselesi barlyq elge ortaq. Onyń ishinde Qazaqstan da bar. Bıyl jyl basynan beri adam saýdasy boıynsha 110 qylmys anyqtaldy. Degenmen bul tek resmı derek. Halyqaralyq uıymdar men úkimettik emes uıymdardyń dereginshe eńbek jáne seksýaldy quldyqqa tap bolǵandardyń sany áldeqaıda kóp. Qazaqstan adam quqyqtary salasyndaǵy 60-tan astam sharttyń tolyq qatysýshysy. Onyń ishinde 13 shart quldyqpen kúreske baılnanysty», - dedi Qalıolla Seıtenov elordada ótip jatqan halyqaralyq konferentsııada.

Onyń málimdeýinshe, Memleket basshysynyń tapsyrmasy boıynsha «Adam saýdasyna qarsy is-qımyl týraly» zań jobasy ázirlendi.

«Jańa zań jobasy 6 taraýdan turady jáne birneshe mindetti iske asyrýǵa baǵyttalǵan. Atap aıtqanda, memlekettik saıasattyń quqyqtyq jáne uıymdastyrýshylyq negizderin qurý, jekelegen uǵymdardy halyqaralyq standarttarǵa sáıkes keltirý, qarsy is-qımyl sýbektileri bolyp tabylatyn memlekettik organdar men úkimettik emes uıymdardyń ýákiletti organyn aıqyndaý.

Sonymen qatar ýákiletti organdardyń quzyretin bekitý, vedomstvoaralyq úılestirý jáne ózara is-qımyl máselelerin retteý, saýda qurbandaryna kómek kórsetý jáne kámeletke tolmaǵan jábirlenýshilerdiń quqyǵyn qorǵaý», - deıdi akademııa basshysy.

Buǵan deıin habarlaǵanymyzdaı, búgin elordada «Adam saýdasyna qarsy kúreste ulttyq jáne halyqaralyq seriktestikti nyǵaıtý» atty halyqaralyq konferentsııa ótip jatyr.

Atalǵan is-sharaǵa qatysýshylar arasynda Qazaqstan, Qyrǵyzstan, Ózbekstan, Túrkmenstan jáne Tájikstan elderiniń ókilderi de bar.