Adam saýdasy úshin 11 adamnan quralǵan qylmystyq top ustaldy – QR ІІM

ShYMKENT. QazAqparat – Shymkentte kámeletke tolmaǵandardy jezókshelikpen aınalysýǵa tartý, jeńgetaılyq, sondaı-aq jynystyq paıdalaný maqsatynda adam saýdasy faktisimen uıymdasqan qylmystyq topqa qatysty is tergelip jatyr, dep habarlaıdy QazAqparat Polisia.kz saıtyna silteme jasap.

«Tergeý barysynda olardyń qylmystyq áreketteri Shymkent, Túrkistan jáne Taraz qalalarynda iske asyrylǵany anyqtaldy. Toptaǵy rólder naqty bólingen. Onyń uıymdastyrýshylary úsh apaly-sińlili bolyp shyqty. Olar senimdi adamdarymen birge qylmystyq áreketterdi úılestirgen. Qorqytý men bopsalaý, «aıyppuldar» arqyly qyzdardy sıntetıkalyq esirtki qoldanýǵa jáne aqyly (keıde ártúrli taýar úshin de) jynystyq qyzmet kórsetýge májbúrlegen.

Toptyń keıbir músheleri jas áıelder men qyzdardy izdeýmen aınalysqan. Olarmen tanysyp, senimine kire otyryp, osy «iske» tartqan.

Belgili bolǵandaı, qyzdardy áleýmettik jeli arqyly Qaraǵandy, Semeı, Atyraý, Shymkent, Taraz, Qyzylorda qalalary men Túrkistan oblysynan tapqan. Bılet satyp alý men turýǵa ketken shyǵyndy qylmystyq toptyń uıymdastyrýshylary tólegen. Toptyń basqa músheleri «ákimshi» jáne «kassır» rólin atqarǵan. Olar qyzdardyń tártibin qadaǵalap, esep pen kassa júrgizip, ınternettegi jarnamalar arqyly tabylǵan «klıentterdi» qabyldap otyrǵan», - delingen polıtsııa málimetinde.

Anyqtalǵandaı, qylmyskerlerdiń tapqan tabysy, búgingi aqparat boıynsha, shamamen 150 mıllıon teńgeni quraıdy.

«Jynystyq saýda qurbandary arasynda 17 - 25 jas aralyǵyndaǵy 14 qyz bar, onyń ishinde altaýy – kámeletke tolmaǵandar. Qyzdardy jaldamaly páterlerde ustap, jezókshelikpen aınalysýǵa májbúrlegen.

Birqatar jaǵdaılarda kúdiktiler qyzdardy ózimen birge ertip, qonaqúıler men saýnalarǵa aparǵan. Qyzdar týǵan-týystaryn tynyshtandyrý úshin ata-analaryna bala kútýshi bolyp jumys isteıtinderin aıtqan. Keıbir jaǵdaılarda uıymdastyrýshylar qyzdardyń ata-analarymen kezdesýge baryp, ózderin «bala kútýshige jumys berýshi» sııaqty kórsetken», - delingen taratylǵan habarlamada.

Qylmystyq shemany uıymdastyrdy degen kúdikpen barlyǵy 11 adam ustalyp, Shymkenttegi tergeý ızolıatoryna qamalǵan.

«Osy fakti boıynsha 18 qylmystyq is qozǵaldy, onyń ishinde: 2 derek – QK-niń 262-babynyń 1, 2-bóligi (Uıymdasqan qylmystyq top qurý jáne oǵan qatysý), 5 derek – QK-niń 128-baby (Adam saýdasy), 5 derek – QK-niń 134-baby 3-bóligi (Kámeletke tolmaǵan adamdy jezókshelikpen aınalysýǵa tartý), 2 derek – QK-niń 308-baby (Jezókshelikke tartý), 3 derek – QK-niń 309-baby (Prıton ustaý men jeńgetaılyq), 1 derek – QK-niń 297-baby (Esirtki zattaryn alý, saqtaý, tasymaldaý) boıynsha.

Tergeý jalǵasyp jatyr», - dedi polıtsııadan. .

Foto: polisia.kz