Adam saýdasy máselesi kún tártibinen túspeı turǵan álemdik qubylysqa aınaldy - Q. Sultanov
Onyń aıtýynsha, adamzat 21 ǵasyrǵa aıaq basyp, ǵylym men tehnıka damyp, adamdardyń ál-aýqaty artyp jatsa da, adam saýdasy máselesi zaman aǵymyna qaraı ózgere túsip, áli kúnge deıin joıylmaı keledi.
«Búginde búkil álem boıynsha mıllıondaǵan adam, adam saýdasy boıynsha ár túrli qysymdyqtarǵa ushyrap jatyr. Qazaqstanda sońǵy birneshe jyldyń ishinde 1160 adam osyndaı jaǵdaıǵa dýshar bolǵan. Biri iz-tússiz joǵalyp ketse, endi biriniń quqyǵy shektelgen, qala berdi urlanǵan. Ókinishke qaraı, olardyń deni jastar jáne kámeletke tolmaǵan balalar. Sondyqtan bizdiń komıssııa tuńǵysh ret osy máseleni kóterip, oǵan qoǵam jáne memleket nazaryn aýdarý úshin, otandyq sarapshylardy tartyp, birneshe aıdyń ishinde osy baıandamany ázirlep shyqtyq. Endi ony Elbasyna, memlekettik organdarǵa, sonymen qatar Eýropadaǵy yntymaqtastyq jáne qaýipsizdik uıymy (EQYU) men Birikken ulttar uıymyna (BUU) jiberemiz. Baıandamada elimizde jáne álemde zańdyq keńistikti qalyptastyrý boıynsha birqatar tyń usynystarymyzdy ortaǵa saldyq» - dedi Q. Sultanov.
Sonymen qatar, Qýanysh Sultanuly el tynyshtyǵyn saqtaýda, ásirese syrttan keletin qaýip-qaterlerge daıyn bolý kerektigin aıtty.
«Qalaı bolǵan kúnde de birde-bir adamnyń quqyǵynyń shektelýine jol berýge bolmaıdy. Sondyqtan, birinshi kezekte memleketimizdegi turaqtylyqty til-kózden saqtasyn. Biraq, álemniń kóptegen elderinde áleýmetitk qaıshylyqtar, qarýly qaqtyǵystar bolyp jatqany barshaǵa málim. ıAǵnı, beıqam otyrýǵa áste bolmaıdy. Biz sekildi tynysh otyrǵan elderdiń tynyshtyǵyn buzýǵa áýestenetinderdiń bar ekenin eskergen jón. Biz qaýipsizdigimizdi qamtamasyz etip, etek-jeńimizdi jıyp júrýimiz kerek» -dedi Q. Sultanov.
Sondaı-aq, QR Prezıdenti janyndaǵy Adam quqyqtary jónindegi komıssııanyń tóraǵasy kóbinese sot sheshimderine baılanysty aryz-shaǵymdardyń túsetindigin jetkizdi.
«Bizdiń komıssııaǵa tikeleı adam saýdasyna qatysty túsetin aryzdar az. Negizinen sot jáne quqyq qorǵaý organdarynyń, ákimdikterdiń sheshimine jáne turmystyq jaǵdaılarǵa baılanysty túsedi. Degenmen, bizdiń komıssııanyń quzyry shekteýli. Endi ár adam óz qylyǵyn durys dep eseptýge beıim ǵoı. Sondyqtan, bizdiń sarapshylar olardyń aryz-shaǵymdaryna quqyqtyq turǵydan baǵa berip, oryn alǵan jaǵdaıǵa baılanysty ádildik jaǵyn anyqtaıdy. Sóıtip, osy másele boıynsha tıisti organdarǵa hat jazyp, olardan jaýap alýǵa quqymyz bar» - dedi Q. Sultanov.
