Adam saýdasynyń qurbany bolǵan 15 adamǵa kómek kórsetildi — QR ІІM
ASTANA. KAZINFORM — Qazaqstanda adam saýdasyna qarsy 2027-2029 jyldarǵa arnalǵan is-qımyl jospary ázirlenip jatyr. Bul týraly QR ІІM Uıymdasqan qylmysqa qarsy kúres departamentiniń basqarma bastyǵy Samat Qusetov aıtyp berdi.
— Sonymen birge, Halyqaralyq kóshi-qon uıymynyń qoldaýymen adam saýdasynyń qurbandaryn anyqtaý jáne olarǵa qajetti kómek kórsetý úshin tıisti uıymdarǵa joldaý jónindegi standartty operatsııalyq rásimder ázirlendi. Al EQYU keńsesiniń qoldaýymen adam saýdasynyń belgileri men osy másele týraly aqparattyq materıaldar daıyndaldy, — dedi S. Qusetov OKQ-da ótken dóńgelek ústelde.
EQYU keńsesiniń qoldaýymen TMD, Ońtústik-Shyǵys Azııa jáne Taıaý Shyǵys elderindegi Qazaqstannyń konsýldyqtary men elshilikteri qyzmetkerlerine, sondaı-aq qalalyq advokattar alqalarynyń advokattaryna arnalǵan onlaın-trenıngter uıymdastyryldy.
Bas prokýratýra men Eńbek jáne halyqty áleýmettik qorǵaý mınıstrligi birlesip, aýyldyq jerlerde eńbek qanaýyna jol bermeý jáne májbúrli eńbek faktilerin anyqtaý baǵytyndaǵy jumystardy jalǵastyryp keledi.
Adam saýdasy qurbandarynyń quqyqtaryn qorǵaý úshin polıtsııa men áleýmettik qyzmetter arasyndaǵy ózara is-qımyl qamtamasyz etiledi.
— Jalpy, qaıta baǵyttaý tetigi aıasynda adam saýdasynyń 15 qurbanyna kómek kórsetildi. Onyń ishinde 11 adamǵa advokattardyń quqyqtyq keńesi berilse, 3 jábirlenýshige arnaıy áleýmettik qyzmetter usynyldy, al 1 bala bóbekter úıine ornalastyryldy. 29 jábirlenýshi memlekettik qorǵaýǵa alyndy, — dedi spıker.
Aıta keteıik, 30 shilde — Dúnıejúzilik adam saýdasyna qarsy kúres kúni. Bıylǵy is-sharalar «Alaıaqtyq tuzaǵynda» uranymen ótedi. Bul ınternet-alaıaqtyqqa májbúrleý sııaqty adam saýdasynyń jańa túrlerine nazar aýdarýǵa baǵyttalǵan.
