Adam saýdasyna qatysty qylmystar negizinen iri qalalarda bolady - ІІM
ASTANA. KAZINFORM – QR Іshki ister mınıstriniń birinshi orynbasary Marat Qojaev adam saýdasyna qatysty qylmystar kóbine qaı jerlerde jasalatynyn aıtty.
«Adam saýdasy sanatyna jatatyn qylmystarǵa toqtalsaq, onymen negizinen jezókshelikpen aınalysatyn oryndar men jeńgetaılyqty uıymdastyratyn adamdar aınalysady. Mundaı 67 derek bar. Olar elimizdegi iri qalalar men oblys ortalyqtarynda kóp kezdesedi», - dedi M. Qojaev Parlament Májilisinde tilshiler suraǵyna jaýap bere otyryp.
Bul turǵyda ol búgin Májiliste qabyldanǵan adam saýdasyna qarsy is-qımyldy retteıtin zańda bul baǵytta jazany kúsheıtý qarastyrylmaǵanyn aıtty.
«Adam saýdasy úshin onsyz da qatań jaza bar. Máselen, jańa týǵan náresteler men kámeletke tolmaǵandardy saýdalaǵany úshin 18 jylǵa deıin bas bostandyǵynan aıyrý qarastyrylǵan. Sondyqtan búgin qabyldanǵan zań atalǵan qylmystar úshin jaýapkershilikti kúsheıtýdi qarastyrmaıdy», - dep túsindirdi mınıstrdiń birinshi orynbasary.
Aıta keteıik, Búgin Májilistiń jalpy otyrysynda «Qazaqstan Respýblıkasyndaǵy adam saýdasyna qarsy is-qımyl týraly» Zańy ekinshi oqylymda qaralyp, qabyldandy.
Qujatta adam saýdasyna qarsy is-qımyl jónindegi jumystardy úılestirý maqsatynda konsýltatıvtik-keńesshi organdardyń jumys isteýi, ýákiletti organdar men adam saýdasyna qarsy is-qımyl sýbektilerin aıqyndaý eskerilgen.
