Adam saýdasyna qarsy kúreste álem birigýi tıis – BUU Bas hatshysy
ASTANA. KAZINFORM – 30 shilde — Adam saýdasyna qarsy kúrestiń Dúnıejúzilik kúnine oraı BUU Bas hatshysy Antonıý Gýterrısh bul qubylysty «adam quqyqtaryn óreskel buzatyn, jantúrshigerlik qylmys» dep atady. Bul týraly AZERTADJ agenttigi habarlady.
Onyń aıtýynsha, adam saýdasy — aldaý, májbúrleý jáne qanaýǵa negizdelgen qatigez ári joǵary deńgeıde uıymdastyrylǵan qylmystyq áreket. Ol jyldam qarqynmen damyp keledi. Qylmystyq toptar halyqaralyq deńgeıde zańdaǵy olqylyqtardy paıdalana otyryp, zańdy salalarǵa enip, jetkizý tizbekterine kirigip, kóshi-qon aǵyndaryn óz múddesine qoldanyp otyr. Sondaı-aq olar tehnologııany da belsendi paıdalanyp, ınternet arqyly jynystyq qanaý, kıberqylmysqa ıtermeleý sııaqty tásildermen qurbandardy baqylaýda ustaıdy.
— Biz dereý birigip, naqty áreket etýimiz kerek, — dedi Bas hatshy.
Ol adam saýdasyn qoldaıtyn bıznes-modeldi joıyp, jazasyzdyqty toqtatyp, zańsyz tabysqa jol bermeý, quqyq qorǵaý organdary men sot júıesin nyǵaıtý qajet ekenin aıtty.
— Qylmyskerler jaýapqa tartylýy tıis, — dep basa aıtty Gýterrısh.
Sondaı-aq ol azamattyq qoǵammen jáne jeke sektormen, ásirese tehnologııalyq kompanııalarmen seriktese otyryp, aqparattandyrý, aldyn alý jáne álsiz toptardy qorǵaý boıynsha jumys isteýdiń mańyzdylyǵyn atap ótti. Sonymen qatar jábirlenýshilerdiń quqyǵyn qorǵaý, májbúrli kóship-qonýshylardy qoldaý jáne kedeılik, teńsizdik, qaqtyǵystar men klımattyq daǵdarystar sekildi negizgi sebeptermen kúresý qajettigin aıtty.
— Adam saýdasyna qarsy kúrestiń osy Dúnıejúzilik kúninde biz birlese áreket etip, qurbandardy qorǵaýǵa, kinálilerdi jaýapqa tartýǵa jáne eshkim satylmaıtyn, satyp alynbaıtyn, qanaýǵa túspeıtin álem qurýǵa kúsh salýymyz kerek, — dep qorytyndylady BUU Bas hatshysy.
Aıta ketelik elde jyl basynan beri adam saýdasyna qatysty 285 qylmystyq is tirkelgen. Onyń 28-i kámelet jasyna tolmaǵan balalarǵa baılanysty.