Adam saýdasymen kúres. Túrikmenstan 5 jyldyq is-qımyl josparyn qabyldady
ASTANA. KAZINFORM — Túrikmenstan prezıdenti Serdar Berdimuhamedov adam saýdasyna qarsy kúres jónindegi 2025-2029 jyldarǵa arnalǵan jańa ulttyq is-qımyl josparyn bekitti.
Bul týraly Turkmenportal habarlady, dep jazdy Anadoly aqparat agenttigi.
Bul jospardy úkimet otyrysynda eldiń syrtqy ister mınıstri Rashıd Meredov tanystyrdy. Qujat bes bólimnen turady jáne adam saýdasymen kúres boıynsha maqsatty sharalar keshenin qarastyrady. Josparda is-sharalardy júzege asyrý merzimderi, tıimdilik kórsetkishteri, jaýapty memlekettik organdar naqty belgilendi. Bul saladaǵy halyqaralyq yntymaqtastyqty keńeıtýge erekshe kóńil bólinedi.
Adam saýdasyna qarsy kúresti kúsheıtýdegi mańyzdy qadamdardyń biri 2024 jyly Vedomstvoaralyq komıssııanyń qurylýy boldy, onyń qatysýymen jańa jospar ázirlendi. Qujat Halyqaralyq kóshi-qon uıymy (HKU) jáne BUU Esirtki jáne qylmys jónindegi basqarmasymen (UNODC) birlesip ázirlengen.
Buǵan deıin elde 2016-2018 jáne 2020-2022 jyldarǵa arnalǵan osyndaı ulttyq josparlar júzege asyrylǵan bolatyn.
Túrikmenstan prezıdenti Serdar Berdimuhamedov adam saýdasymen kúres halyqaralyq qaýymdastyqpen kelisilgen ózara is-qımyldy qajet etetin mańyzdy jahandyq problemalardyń biri bolyp qala beretinin málimdedi.
Eske salsaq, osyǵan deıin Qazaqstan men Túrikmenstan halyqaralyq marshrýttaǵy júrgizýshiler úshin vızalyq rejımdi joıatynyn jazǵan edik.