Adam saýdasymen kúres: Sońǵy jyldary Mıanmadan 49 azamat elge qaıtaryldy
ASTANA. KAZINFORM — Qazaqstan adam saýdasyna qarsy is-qımyldyń ulttyq júıesin jetildirip, qazirgi zamanǵy qanaý túrlerinen zardap shekkenderdi qorǵaýdyń halyqaralyq tetikterin damytýǵa óz úlesin qosyp keledi.
QR Syrtqy ister mınıstrliginiń Erekshe tapsyrmalar jónindegi elshisi Stanıslav Vasılenkonyń aıtýynsha, Qazaqstan adam quqyqtary salasyndaǵy, onyń ishinde quldyqtyń zamanaýı túrlerimen kúreske baǵyttalǵan 60-tan astam halyqaralyq shartqa qatysady.
2024 jyly elimizde halyqaralyq 4P qaǵıdatyna (áriptestik, aldyn alý, qylmyskerlerdi qýdalaý jáne jábirlenýshilerdi qorǵaý) negizdelgen «Adam saýdasyna qarsy is-qımyl týraly» Zań qabyldandy.
— AQSh Memlekettik departamentiniń 2025 jylǵy adam saýdasy týraly baıandamasyna sáıkes, Qazaqstan adam saýdasyna qarsy kúres baǵytyndaǵy jumysyn kúsheıtti. Atap aıtqanda, aıyptaý úkimderiniń sany, anyqtalǵan qurbandar jáne halyqtyń osal toptaryn qorǵaý jónindegi sharalar artty, — dedi Stanıslav Vasılenko OKQ-da ótken dóńgelek ústelde.
Sonymen birge, 2026 jylǵy maýsymda BUU Qylmystyń aldyn alý jáne qylmystyq sot tóreligi jónindegi komıssııasynyń sessııasynda Qazaqstan Belarýs Respýblıkasymen birlesip «Qylmystyq áreket jasaýǵa májbúrleý maqsatyndaǵy adam saýdasyna qarsy is-qımyl» atty qarar jobasyn usynyp, onyń qabyldanýyna qol jetkizdi. Bul halyqaralyq deńgeıde adam saýdasyna qarsy kúrestiń jańa tásilderin damytýǵa baǵyttalǵan mańyzdy qadam boldy.
EQYU-men birlesip Qazaqstan sheteldegi mekemeler úshin adam saýdasy qurbandaryn anyqtaý jáne olardy qorǵaý jónindegi is-qımyl algorıtmin ázirledi. Sondaı-aq táýekeli joǵary elderde qyzmet atqaratyn konsýldyq qyzmetkerlerdi oqytý jumystary júrgiziledi.
— Sońǵy jyldary qazaqstandyq dıplomattardyń kómegimen shetelden 61 Qazaqstan azamaty, onyń ishinde Mıanma aýmaǵynan 49 azamat elge qaıtaryldy. Jalpy, Mıanma bıliginiń málimetinshe, el aýmaǵynda 100 myńǵa jýyq adam jumys isteıtin kóptegen skam-ortalyq bar. Bul Qazaqstandaǵy shaǵyn qalalardyń biriniń halqyna shamalas kórsetkish. Sonymen qatar, Qazaqstan osyndaı jaǵdaıǵa tap bolǵan úshinshi el azamattaryn, sonyń ishinde Qyrǵyzstan men Tájikstan azamattaryn bosatýǵa da járdem kórsetti, — dedi Vasılenko.
Onyń aıtýynsha, eńbek qanaýynyń túrli shemalaryna tartylǵan qazaqstandyqtardyń sany azaıǵan. 2026 jylǵy mamyrdaǵy jaǵdaı boıynsha 5 azamat bosatylyp, elge qaıtaryldy. Bul kórsetkish ótken jyldarmen salystyrǵanda edáýir tómen.
Sonymen birge, Qazaqstannyń Vetnamdaǵy elshiliginiń qatysýymen Kambodja men Laos aýmaǵynan Qazaqstan azamattaryn bosatýǵa kómek kórsetildi.
Aıta keteıik, 30 shilde — Dúnıejúzilik adam saýdasyna qarsy kúres kúni. Bıylǵy is-sharalar «Alaıaqtyq tuzaǵynda» uranymen ótedi. Bul ınternet-alaıaqtyqqa májbúrleý sııaqty adam saýdasynyń jańa túrlerine nazar aýdarýǵa baǵyttalǵan.
Qazaqstanda adam saýdasyna qarsy 2027-2029 jyldarǵa arnalǵan is-qımyl jospary ázirlenip jatyr.
