Adam saýdasy tyıylar emes: jarty jylda 285 is tirkeldi
ASTANA. KAZINFORM — Búgin — Dúnıejúzilik adam saýdasymen kúres kúni. Elimizde jyl basynan beri adam saýdasyna qatysty 285 qylmystyq is tirkelgen. Onyń 28-i kámelet jasyna tolmaǵan balalarǵa baılanysty.
Al byltyr dál osyndaı 445 is qozǵalǵan. Bul — Quqyqtyq statıstıka jáne arnaıy esepke alý organdarynyń portalynda kórsetilgen málimet.
— Qylmystyq kodekste adam saýdasyna baılanysty qylmys úshin jaýapkershilik 8-bapta kózdelgen (116-bap, 125-bap 3-bólim 2-tarmaq; 126-bap 3-bólim 2-tarmaq; 128, 134, 135, 308, 309). Osy baptar boıynsha qylmyskerdiń múlki tárkilenedi, eń joǵarǵy jaza — 18 jylǵa deıin bas bostandyǵynan aıyrý. Mundaı jaza óte qatal jáne basqa aýyr qylmys úshin kózdelgen jazamen sáıkes keledi, — deıdi ІІM mamandary Kazinform tilshisiniń resmı saýalyna bergen jaýabynda.
Mamandar bul qylmys, eń aldymen qandaı adamdardy nysanaǵa alatynyn aıtty.
— Tájirıbe kórsetkendeı, halyqtyń áleýmettik osal toptary: jeke basyn kýálandyratyn qujattary joq adamdar, jumyssyzdar, úısizder, múmkindigi shekteýli jandar, zańsyz mıgranttar — adam saýdasynyń jıi qurbanyna aınalady, — deıdi olar.
Mundaı jaǵdaılarǵa tap bolýǵa yqpal etetin faktorlar:
• aqparattyń jetkiliksizdigi
• quqyqtyq saýattylyqtyń tómendigi
• arzan jumys kúshine suranys
• ınternettiń áseri
• jeńil aqsha tabýǵa jáne «ádemi ómir súrýge» umtylý
• sondaı-aq sheteldikterdiń zańsyz mártebesi jáne basqa da sebepter.
Adam saýdasynyń qurbandaryna memlekettik bıýdjet esebinen kómek kórsetiledi.
— Zardap shekkenderge 8 túrli qyzmet usynylady: áleýmettik-turmystyq, medıtsınalyq, psıhologııalyq, pedagogıkalyq, eńbek, mádenı, ekonomıkalyq jáne quqyqtyq kómek. Osyndaı qyzmetter qylmystyq is qozǵalǵan-qozǵalmaǵanyna qaramastan kórsetiledi. Budan bólek, adam saýdasynyń qurbany azamattyq zańnama sheńberinde materıaldyq jáne moraldyq zııandy óteýdi talap etýge quqyly. Bul týraly ony sotqa deıingi tergep-tekserýdi júrgizip jatqan tulǵa mindetti túrde habardar etedi, — delingen jaýapta.
Aıta keteıik, birer kún buryn ІІM adam saýdasyna qatysy bar eki qylmystyq topty ustady.