Adam saýdalaýshylardyń birqatary zań júzinde jaýapqa tartylmaı otyr - G.Ábdihalyqova
ASTANA. 26 sáýir. QazAqparat /Aıdar Ospanalıev/ - «Búginde Qazaqstan BUU-nyń transulttyq uıymdasqan qylmyspen kúres konventsııasy men onyń qosymsha qujattaryn ratıfıkatsııalady. Sondaı-aq elimizde adam saýdasymen baılanysty qylmystardyń aldyn alý men onymen kúreske baǵyttalǵan arnaıy jospar da bar.
Soǵan qarmastan úkimettik emes uıym ókilderi adam saýdalaýshylardyń talapqa saı jaýapqa tartylmaı otyrǵandyǵyn aıtýda»,-dedi búgin Qazaqstan Respýblıkasynyń Prezıdenti janyndaǵy Áıelder isi jáne otbasy-demografııalyq saıasat jónindegi ulttyq komıssııanyń májilisinda atalmysh komıssııa tóraıymy Gúlshara Ábdihalyqova.
Onyń málimetterine qaraǵanda, 2009 jyly elimizde 24 adam saýdalaýshy sottalǵan. Olardyń 20-sy adamdardy seksýaldyq maqsattarǵa, al 3-ýi jumysqa salý úshin saýdalaǵan. «Soǵan qaramastan, atalǵan azamattardyń birqatary talapqa saı jaýapqa tartylmaǵan»,-dedi komıssııa tóraıymy.
