Adam sany beseýden asatyn úlken otbasylarda kedeılik deńgeıi eki ese joǵary

ASTANA. QazAqparat - Qazaqstanda tabysy eń tómengi kúnkóris deńgeıinen tómen halyqtyń úlesi osy jyldyń II toqsanynda 5,1% boldy. Kedeıliktiń tereńdigi men ótkirligi kórsetkishteri tıisinshe 1 jáne 0,3 paıyzdy qurady, dep habarlaıdy QazAqparat ulttyq statbıýroǵa silteme jasap.

Qalalyq jáne aýyldyq jerde tabysy eń tómengi kúnkóris deńgeıinen tómen halyqtyń úlesin aıtarlyqtaı úlken aıyrmashylyq áli de saqtalyp otyr.

Máselen, esepti kezeńde aýyldyq jerdegi kórsetkishtiń máni qalalyq jerdegi kórsetkishtiń máninen (3,9%) 3,3 p.t. asyp túsip 7,2% qurady.

Kedeılik qaýpine otbasy músheleriniń sany qatty áser etedi.

Osylaısha, 5 jáne odan da kóp adamnan turatyn úı sharýashylyqtary arasyndaǵy kedeılik deńgeıi 2023 jyldyń II toqsanynyń qorytyndysy boıynsha 9,2% qurady.

Bul jalpy kedeılik deńgeıinen 2 ese derlik joǵary.

2023 jyldyń II toqsanynda jan basyna shaqqandaǵy eń tómengi kúnkóris deńgeıi aıyna orta eseppen 47 884 teńge boldy.