Adam papılloma vırýsyna qarsy vaktsınany uldarǵa da salý usynyldy

ASTANA. KAZINFORM – Májilis depýtaty Ashat Aımaǵambetov tegin ári erikti túrde er balalarǵa adam papılloma vırýsyna qarsy vaktsına salýdy usyndy.

- Ótken aptada biz Densaýlyq saqtaý mınıstrine ata-analar kezdesýlerde kótergen bir suraqpen júgindik. Atap aıtqanda – er balalardy adam papıllomasy vırýsyna (APV) qarsy erikti vaktsınatsııalaý baǵdarlamasyna qosý máselesi. Qazir Qazaqstanda qyz balalar adam papılloma vırýsyna qarsy ekpeni tegin alyp jatyr. Bul – myńdaǵan adamnyń ómirin saqtap qalatyn mańyzdy sheshim jáne úlken jetistik, - dep jazdy Ashat Aımaǵambetov Telegram paraqshasynda.

Halyq qalaýlysy atalǵan vırýsqa qarsy ekpe egý tájirıbesin keńeıtý qajet dep sanaıdy.

- Adam papılloma vırýsy – tek «áıelderge tán vırýs» emes. Bul vırýs jatyr moıny obyrynan bólek, kómeı, aýyz qýysy, tik ishek obyry sııaqty basqa da onkologııalyq aýrýlarǵa erler arasynda da sebep bolýy múmkin. Búginde kóptegen elde er balalar da qyzdarmen qatar vaktsına alady. Sondyqtan biz bul ekpeni erikti negizde alýǵa múmkindik berýdi usyndyq. Vaktsınany dárihanalardan tabý qıyn, sondyqtan memleket tarapynan oǵan qoljetimdilikti qamtamasyz etý mańyzdy. Densaýlyq saqtaý mınıstrligi bul bastamany qoldaıdy dep úmittenemiz. Sebebi er balalar da qaýip tobyna jatady. Olardyń densaýlyǵy nazardan tys qalmaýy tıis, - dep tolyqtyrdy depýtat.

Aıta keteıik, sáýirde elimizde er balalarǵa adam papılloma vırýsyna qarsy vaktsına egilýi múmkin ekendigi týraly habarlaǵan edik. 

Eske salaıyq, byltyr qyrkúıekte elimizde jatyr moıny obyrynyń negizgi qozdyrǵyshy — adam papılloma vırýsyna (APV) qarsy qyzdardy jalpy vaktsınalaý bastaldy. Osy oraıda Kazinform agenttiginiń tilshisi Qazaqstanda atalǵan ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajet ekenine sholý jasaǵan edi. 

Ótken jyly Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi.