Adam papılloma vırýsyna qarsy ekpe alý ne úshin mańyzdy — maman keńesi

ASTANA. KAZINFORM — Onkologııalyq ǵylymı ınstıtýttyń derekteri boıynsha jyl saıyn 2 myń áıel jatyr moıny qozdyrǵyshy dertine shaldyǵady, al 600-deı áıel osy syrqattan kóz jumady.

Osy oraıda atalǵan vırýsqa qarsy vaktsınanyń mańyzdylyǵy týraly Densaýlyq saqtaý mınıstrligi janyndaǵy Ulttyq qoǵamdyq densaýlyq saqtaý ortalyǵy basqarma tóraǵasynyń orynbasary Manar Smaǵul aıtyp berdi.

— Ekpeni erte jasta alsa, onyń tıimdiligi joǵary, sebebi atalǵan vırýs túri Ortalyq jáne Ońtústik Azııa aýmaǵynda keń taralǵan. Jalpy ótken ǵasyrdyń 60-jyldary nemis ǵalymy jatyr moıny obyrynyń negizgi qozdyrǵyshy vırýsyna zertteý júrgizdi. 2007-2008 jyldary damyǵan memleketter bul vırýsqa qarsy vaktsına egýdi kúntizbege engizdi. Osy oraıda 2030 jylǵa deıin 15 jastaǵy jetkinshek qyzdardyń 90%-yna vaktsına egý kerek, — dedi Manar Smaǵul adam papılloma vırýsyna qarsy vaktsınatsııaǵa arnalǵan is-shara barysynda.

Mamannyń aıtýynsha, búginde elimizde jatyr moıny obyrymen syrqattanýshylyq kórsetkishi joǵary. 

— Áıelder arasynda birinshi orynda omyraý qaterli isigi (sút bezi) tursa, ekinshi orynda osy jatyr moıny qozdyrǵyshy, ıaǵnı adam papılloma vırýsy tur. Onkologııalyq ǵylymı ınstıtýttyń derekteri boıynsha jyl saıyn 2 myń áıel jatyr moıny qozdyrǵyshy dertimen aýyrady, ıaǵnı kúnine 5-6 áıelden bul qaterli isik anyqtalady, al 600-deı áıel osy syrqattan kóz jumady. Bizdiń maqsat — jylyna 100 adamǵa shaqqanda, 4 qana fakti tirkeý, ol úshin vaktsınamen qamtýdy joǵary deńgeıde qamtý qajet, — deıdi ol.

Sondaı-aq ulttyq qoǵamdyq densaýlyq saqtaý ortalyǵynyń ókili vaktsınanyń oń áseri birden emes, 10 jyldan keıin baıqalatynyn aıtyp otyr. 

Aıta keteıik, búgin elordada Ulttyq qoǵamdyq densaýlyq saqtaý ortalyǵynyń uıytqy bolýymen adam papılloma vırýsyna (APV) qarsy ekpe egý sharasy aıasynda konferentsııa ótip jatyr. Atalǵan sharaǵa sala mamandary qatysty. 

Buǵan deıin Qazaqstanda er balalarǵa da adam papılloma vırýsyna qarsy vaktsına egý josparda baryn habarlaǵan bolatynbyz. 

Eske sala keteıik, byltyr qyrkúıekte elimizde jatyr moıny obyrynyń negizgi qozdyrǵyshy — adam papılloma vırýsyna (APV) qarsy qyzdardy jalpy vaktsınalaý bastaldy. Osy oraıda Kazinform agenttiginiń tilshisi Qazaqstanda atalǵan ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajet ekenine sholý jasaǵan edi.

Ótken jyly Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi. 

Sondaı-aq elimizde adam papılloma vırýsyna qarsy vaktsınanyń densaýlyqqa áseri zerttelip jatqany aıtyldy. 

Odan bólek, áleýmettik jelilerde jáne messendjerlerde adam papıllomasy vırýsy (APV) vaktsınatsııasy bedeýlikke ákeletini týraly jalǵan aqparat tarady.