Adam, onyń ál aýqaty jáne óńirlerdi damytý máseleleri Prezıdenttiń basty nazarynda — Aıbek Dádebaı
ASTANA. KAZINFORM — Búgin Quryltaı otyrysynda Tóraǵa Aıbek Dádebaı Prezıdent Joldaýynyń mańyzy jóninde málimdeme jasady.
Onyń sózinshe, Memleket basshysynyń Joldaýy — elimizdiń jańa jaǵdaıdaǵy aldaǵy naqty naqty damý baǵdaryn aıqyndaıtyn baǵdarlamalyq qujat.
— Bul — Konstıtýtsııa qabyldanyp, búkil saıası júıe jańǵyrtylǵannan keıingi alǵashqy joldaý. Endi Memleket basshysy jańa saıası ınstıtýttardyń aldyna naqty mindetter qoıyp otyr, ıaǵnı — júrgizip jatqan reformalardy naqty mazmunmen baıytyp, olardyń júzege asyrylýyn qamtamasyz etý. Osy oraıda, Quryltaı depýtattaryna da zor úmit artyp otyr, — dedi Aıbek Dádebaı.
Sonymen qatar, Prezıdentimizdiń basty nazarynda árdaıym adam, onyń ál aýqaty jáne óńirlerdi damytý máseleleri turǵanyn atap ótti.
— Árbir qazaqstandyq joldaýdan ózi úshin mańyzdy sheshimderdi taba alady. Eń bastysy, joldaý elimiz ben azamattardyń ıgiligi jolynda barlyq memlekettik jáne qoǵamdyq qurylymdardyń júıeli ári qarqyndy jumys isteýine tyń serpin beredi. Prezıdent uzaq ýaqyt boıy tıisti sheshimin tappaı kelgen túıtkildi máselelerge taǵy da naqty jaýap berdi. Olar elimizdiń aldaǵy uzaq jylǵa arnalǵan tabysty ári ornyqty damýynyń berik negizin qalady, — dedi Quryltaı Tóraǵasy.
Odan bólek, depýtattyq korpýs Memleket basshysynyń sapaly ári ýaqytyly oryndalýy úshin barlyq kúsh jigerin jumsaıtynyn atap ótti.
Aıta keteıik, buǵan deıin Quryltaı otyrysynda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý jóninde hattamany ratıfıkatsııalaý týraly» zań jobasyn eki oqylymda qarap, qabyldaǵanyn jazǵanbyz.
