Adam ómirin órtten arashalaǵan áskerı qyzmetshi «El qorǵany» medalimen marapattaldy

Vzvod serjanty – jaýyngerlik jáne dene shynyqtyrý daıyndyǵynyń nusqaýshysy aǵa serjant Meırambek Ysqaqovty madaqtaý rásimi 68665 áskerı bóliminde ótti, dep habarlaıdy Kazinform.

Otan qorǵaýshynyń mundaı batyl áreketi joǵary basshylyqtan laıyqty baǵasyn aldy. Tótenshe jaǵdaıda kórsetken tabandy is-qımyly úshin Qorǵanys mınıstri general-polkovnık Rýslan Jaqsylyqov áskerı qyzmetshini «El qorǵany» medalimen marapattady. 

Qurmet kórsetý rásimine áskerı bólimniń basshylyǵy men jeke quramy qatysty. Qorǵanys mınıstriniń atynan Meırambekke vedomstvolyq nagradany Qurlyq áskerleriniń bas qolbasshysy general-maıor Asan Júsipov tabys etti. 

– Áriptesimizdiń is-áreketi pogon taqqan adamdardyń boryshty asqan abyroımen oryndaýymen erekshelenetinin jáne adamdardy qutqarý kezinde ózin qurban etýge daıyn ekenin kórsetse kerek. Biz búgin qıyn sátte batyldyq tanytqan batyrymyzǵa qurmet kórsetýdemiz. Otanyna laıyqty, batyl ul tárbıelegen ata-anasyna myń alǵys aıtamyz, – dedi ol. 

Úshinshi jeltoqsan kúni keshke aǵa serjant Meırambek Ysqaqov úıdiń janyndaǵy turaqta janyp jatqan kólikti kórgen bolatyn. Áskerı qyzmetshi oqıǵa týraly Astana qalasy Tótenshe jaǵdaılar departamentiniń 101 ortalyǵyna tez arada habarlaǵan. 

Kólikke júgire jetken ol salonda qoıý tútinge tunshyǵyp, esinen tanyp qalǵan júrgizýshi bar ekenin baıqaǵan. Esikti ashqan Meırambek zardap shekken adamdy janyp jatqan kólikten shyǵaryp, oǵan alǵashqy medıtsınalyq kómek kórsetken. 

Oqıǵa kýágerleri jedel járdem shaqyrdy. Júrgizýshi № 1 qalalyq aýrýhanaǵa jatqyzyldy. Áskerı qyzmetkerdiń shuǵyl áreketi oqıǵanyń aldyn alýǵa yqpal etti. Jalynǵa oranǵan kólikti sóndirýge sonymen qatar ótip bara jatqan júrginshilerdiń biri kólikte adamnyń bar-joǵyn tekserip, kómektesken.