Adam ómirin quqtarý jolynda: TJM avıatsııasynyń ushqyshy Bıbihan Turysbekova
ASTANA. KAZINFORM - Jetinshi synyptan bastalǵan arman búginde bıik maqsat pen úlken jaýapkershilikti talap etetin mamandyqqa ulasty. Bıbihan Turysbekova — QR TJM «Qazavıaqutqarý» AQ-nyń Mı-8 jáne Ka-32 tikushaqtarynyń ekinshi ushqyshy. Ol úshin avıatsııa - bala kúngi armanyn júzege asyrýdyń jáne tańdaǵan isine adal bolýdyń kórinisi.
Bıbihan Dáýletbaıqyzy ushqysh bolýdy jetinshi synyptan bastap armandaǵan. Mektepti aıaqtaǵan kezde bolashaq mamandyǵyn tańdaýda esh kúmándanbaǵan. Osylaısha, ol avıatsııa salasynda bilim alyp, Azamattyq avıatsııa akademııasyn úzdik támamdady.
2021 jyly TJM «Qazavıaqutqarý» AQ-da eńbek jolyn bastap, kásibı qyzmetine kiristi. Onyń kásibı joly avıatsııaǵa degen qyzyǵýshylyqtan bastalyp, adam ómirin saqtaýǵa baǵyttalǵan jaýapty qyzmetpen jalǵasyp keledi.
Avıatsııaǵa kelýine áser etken sebepterdiń biri kóptegen qalalardy kórý múmkindigi. Alǵashqy ushýynan alǵan áseri áli kúnge deıin esinde. Onyń aıtýynsha, árbir ushý erekshe sezim syılaıdy.
TJM avıatsııasynyń qyzmeti tótenshe jaǵdaılardyń aldyn alý men olardy joıýǵa, izdestirý-qutqarý jumystaryna jáne sanıtarlyq avıatsııa arqyly naýqastardy tasymaldaýǵa baǵyttalǵan. Mundaı mindetterdi oryndaý ushý ekıpajynan joǵary kásibılikti, muqııat daıyndyqty jáne qaýipsizdik talaptaryn qatań saqtaýdy talap etedi.
-Ár ushý - óz aldyna jaýapkershilik. Ár reıste sen tek óziń úshin emes, jolaýshylar úshin de jaýap beresiń. Keı sátterde aýa raıyna nemese jaǵdaıǵa baılanysty jedel sheshim qabyldaýǵa týra keledi. Biraq ondaı kezde emotsııa emes, bilim men daıyndyq kómektesedi, - dep atap ótti Bıbihan.
Búginde TJM avıatsııasynda qyzmet atqaratyn Bıbihan Dáýletbaıqyzy úshin tańdaǵan mamandyǵyna degen súıispenshilik pen alǵa qoıǵan maqsattary yntalandyrýshy kúsh bolyp tabylady. Sonymen qatar jaqyndarynyń senimi oǵan jiger beredi.
Bıbihan Dáýletbaıqyzy óziniń kásibı jolyn TJM avıatsııasymen baılanystyrǵanyn maqtan tutady. Óıtkeni mundaǵy árbir ushý adamdarǵa kómek kórsetýge, qıyn jaǵdaıda qoldaý bildirýge jáne adam ómirin saqtaýǵa baǵyttalǵan mańyzdy mindet. Onyń tańdaýy — bala kúngi armanyna degen adaldyqtyń, al qyzmeti — el ıgiligi jolyndaǵy jaýapkershiliktiń kórinisi.
Osyǵan deıin Astanadaǵy egiz aǵaıyndy qutqarýshy týraly jazdyq.
