Adam ómirin qutqarý úshin qarańǵyda qystaqqa jaıaý baratynbyz - medbıke Qarlyǵash Ábdibaeva

«Biz bala kezimizde oınap júrgende úı aralap, «ýkol» salýshy edi ǵoı dárigerler. Sonda bir jaǵynan qorqatynbyz. Ekinshi jaǵynan qyzyǵatynbyz. Ol kisilerdiń aralap kelip, ýkol salyp ketkeni, qaraǵany maǵan sondaı qyzyq dúnıe boldy da, men de osyndaı dáriger bolsam degen armanda boldym. Biraq dárigerlikke shamam kelgen joq. Balany anasynan buryn kórý ǵajap dúnıe ǵoı degen oı júrdi. Sodan akýsherlik mamandyqty tańdadym. Sol salada 4-5 jyldaı jumys istedim», - deıdi Qarlyǵash Ábdibaeva.

Taldyqorǵan medıtsınalyq ýchılışesin 1980 jyly tamamdaǵan ol qaladaǵy perzenthanaǵa jumysqa turady. Araǵa birneshe jyl salyp týǵan aýyly Baqalyǵa feldsher bolyp barady da, sol jerde 1997 jylǵa deıin eńbek etti. Al 1997 jyldyń qarasha aıynan osy ýaqytqa deıin Eńbek aýylynda medbıke bolyp jumys istep jatqan jaıy bar.

«Bir jerde jumys isteý maǵan tıimdi jáne unaıdy. Sebebi osy aýyldyń eńbektegen balasynan eńkeıgen qarııasyna deıin bárin tanımyn. Úıi qaı jerde? Turmystary qalaı? Bárin bilemiz. Aýyryp, jedel járdem kórsetý kerek bolsa, adasyp izdep júrmeımin. Úıine tez jetýge asyǵamyn. 97-shi jyly kelgende maǵan qaralǵan balalardyń aldy ózderi balaly bolyp jatyr. Solardyń balalaryn kórý, olardy emdeý maǵan óte qyzyq. Ózimniń balam, óz nemerelerim sııaqty áser etedi».
 

Taldyqorǵanǵa qarasty Eńbek aýylynda 2 myńdaı halyq turady. Byltyrdan beri aýylǵa 5 mamany bar dárigerlik ambýlatorııa qyzmet kórsetýde. Buǵan deıin bul jerde tek feldsherlik pýnkt jumys istegen. Halyq sanynyń artýyna baılanysty emdeý mekemesi de keńeıe bastady deıdi medbıke Qarlyǵash Ábdibaeva. Áriptesteriniń aıtýynsha, medbıke - úıinde ardaqty jar, eki balanyń anasy. Jumysta óte belsendi. Qoǵamdyq jumystarǵa qatysyp, óleń shyǵarady. 40 jylǵa jýyq ýaqyt ishinde bul jumystyń ystyǵyna kúıip, sýyǵyna tońyp, qyzyǵyn da qıyndyǵyn da kórip kelgenin jasyrmaıdy.

«Ásirese 90-shy jyldary aýylda elektr jaryǵy joq. Jedel járdem kóligi joq. Aýyl mańyndaǵy malshylar otyrǵan qystaqtarǵa jaıaý baratynbyz. Bir kúni malshynyń úıindegi júkti áıelden shaqyrtý tústi. Jańbyrdyń quıyp turǵan qarańǵy túninde jaıaý barǵanym áli kúnge deıin esimnen shyqpaıdy. Bir jaǵynan úreı, qorqynysh. Jalǵyz ózim júgirip bara jatyrmyn. Barmasqa bolmaıdy. Adamdy qutqarý kerek. Taldyqorǵannan jedel járdem kóligin shaqyrtyp, «roddomǵa» salyp jibergenim esimde qalypty», - dep eske alady ol.

Qarlyǵash Ábdibaeva qazir qıyndyqtyń bári artta qalǵanyn aıtady. Densaýlyq saqtaý salasynyń damýyn óz tájirbıesinen baıqaǵan medbıke qazir negizgi kúsh aýrýlardyń aldyn alýǵa baǵyttalǵanyn tilge tıek etip otyr.
 

«Aýyl ishinde obyr, júrek-qan tamyry aýrýlary jáne basqa da indetterdiń aldyn alý úshin jedel járdem kóligimen aralap shyǵamyz. Qazir bári ózgerdi. Jaǵdaı jaqsardy», - dep atap ótti 38 jyl tájirıbesi bar medbıke.

Qarlyǵash Ábdibaeva shaǵyn ujymda jastarǵa baǵyt-baǵdar berip, tájirbıesimen únemi bólisip otyrady. Meıirimdi medbıke - súıip tańdaǵan mamandyǵyna jan-tánimen berilgen eńbekqor adam. Aýyl turǵyndary arasynda da syıly jan tamyz aıynda qurmetti eńbek demalysyna shyǵady.