Adam óltirý, esirtki, organ saýdasy: Qazaqstanda shilde aıynda qandaı qylmystar jasaldy

ASTANA. KAZINFORM – Qazaqstan Іshki ister mınıstrligi qylmyskerlerdi ustaý jáne habar-osharsyz ketken azamattardy izdestirý boıynsha júıeli jumystar júrgizýde. Bul týraly Polisia.kz habarlady.

Mınıstrliktiń málimetinshe, shilde aıynyń basynan beri izdeýde júrgen 67 adam ustaldy. Onyń ishinde:

• adam óltirgeni úshin – 2,

• qaraqshylyq jasaǵany úshin – 1,

• qasaqana aýyr dene jaraqatyn keltirgeni úshin – 1,

• tonaý boıynsha – 6,

• bopsalaý boıynsha – 1,

• urlyq jasaǵany úshin – 39,

• esirtki zattarynyń zańsyz aınalymyna qatysty – 6 adam ustalǵan.

Sonymen qatar, iz-túzsiz joǵalǵan 190 azamattyń ornalasqan jeri anyqtaldy.

- Jedel is-sharalar aıasynda birqatar halyqaralyq deńgeıdegi qylmyskerler de qolǵa tústi. Máselen, Jambyl oblysynyń Shý aýdanynda esirtki satqany úshin memleketaralyq izdeýde júrgen 50 jastaǵy azamat ustaldy. 2024 jyly onyń úıinen bir tonnadan astam keptirilgen marıhýana men bir kılogramm gashısh tárkilengen bolatyn.

Moldova aýmaǵynda Qazaqstan ІІM-niń suraýy boıynsha halyqaralyq izdeýde júrgen Ýkraına azamaty ustaldy. Ol Ulytaý oblysynda Telegram messendjeri arqyly sıntetıkalyq esirtkiler satýmen aınalysqan degen kúdikke ilingen. Zańsyz tabysyn krıptovalıýta bırjasy arqyly zańdastyryp, shetelge aýdaryp otyrǵan. Qazir sotqa deıingi tergeý bastalyp, ony ekstradıtsııalaý máselesi qarastyrylyp jatyr, - delingen aqparatta.

Túrkistan oblysynyń Saryaǵash aýdanynda Qyrǵyzstan azamaty ustaldy. Ol – halyqaralyq qylmystyq toptyń múshesi jáne kórshi elde qylmystyq uıymdy qarjylandyrdy degen kúdikpen izdeýde bolǵan.

Sondaı-aq Almaty qalasynyń áýejaıynda Qytaı azamaty qolǵa tústi. Ol 2024 jyldyń jeltoqsanynda Bahreınde jeke úıge zańsyz kirip, quny 535 629 AQSh dollaryn quraıtyn zergerlik buıymdardy urlaǵan.

Qazaqstan ІІM-niń suraýy boıynsha Túrkııa quqyq qorǵaý organdarymen birlesip Kaıserı qalasynda 40 jastaǵy Ázirbaıjan azamaty ustaldy. Tergeý málimetinshe, ol 2017 jyly Almatyda qylmystyq top quramynda donorlyq organdy zańsyz alyp satýǵa qatysqan.

Mınıstrlik azamattardyń quqyqtary men bostandyqtaryn qorǵaý, zań men tártipti qamtamasyz etý baǵytyndaǵy jumysyn jalǵastyratynyn habarlady.

Aıta keteıik, jaqynda jasyryn tonnel arqyly shekaradan janarmaı ótkizgen halyqaralyq qylmystyq top ustaldy.