Adam óltirgeni úshin kúdikke ilingen Qazaqstan azamaty Túrkııadan ekstradıtsııalandy
ASTANA. KAZINFORM – Búgin Bas prokýratýra men Іshki ister mınıstrliginiń qyzmetkerleri Qazaqstan Respýblıkasy Syrtqy ister mınıstrliginiń qoldaýymen tonaý, kisi óltirý jáne urlyq jasaǵany úshin qylmystyq jaýapkershilikke tartý maqsatynda Qazaqstan azamatyn Túrkııadan ekstradıtsııalady. Bul týraly Qazaqstannyń Bas prokýratýrasy málimdedi.
2022 jyldyń naýryz aıynda Almaty oblysynda kúdikti óziniń aǵasymen birlesip quny 300 mıllıon teńgeden astam temeki ónimderin tasymaldaıtyn júk kóliginiń júrgizýshisine qaraqshylyq shabýyl jasaǵan. Júrgizýshini óltirip, máıitti jol boıyndaǵy shuńqyrǵa kómgen.
«Qylmys jasaǵan kúdiktilerdiń biri ustalyp, nátıjesinde sottaldy, al ekinshisi tergeýden qashyp úlgerdi, sondyqtan oǵan halyqaralyq izdeý jarııalandy. 2023 jylǵy tamyzda ekinshi kúdikti Túrkııada ustaldy. Qazir ol Astanadaǵy tergeý ızolıatorynda qamaýda. Osy qylmystardy jasaǵany úshin múlki tárkilenip, on bes jyldan jıyrma jylǵa deıingi merzimge bas bostandyǵynan aıyrý nemese ómir boıyna bas bostandyǵynan aıyrý túrindegi jaza qarastyrylǵan», — delingen habarlamada.
