Adam óltirip, onyń aqshasyna kólik satyp alǵan kúdikti ustaldy
ASTANA. 8 tamyz. QazAqparat - Almaty polıtseıleri jambyldyq jedel qyzmetkerlerdiń kómegimen
paıdakúnemdik nıetpen 40 jastaǵy áıeldi óltirgen Almaty oblysynyń turǵynyn ustady. Adam máıiti 2011 jylǵy qyrkúıekte Taraz qalasyndaǵy qonaq úılerdiń birinen tabylǵan bolatyn. Bul týraly búgin ІІM ótken brıfıng barysynda mınıstrdiń baspasóz hatshysy Nurdildá Oraz málim etti.
Tergeý málimetterine qaraǵanda, jábirlenýshi Almaty qalasynda turǵan. Avtokólik alý úshin 4 myń AQSh dollaryn jınaǵan azamatsha, Taraz qalasyndaǵy qurbysyna barýdy josparlaǵan. Osy saparynda ol qurbysymen jáne onyń kúıeýimen qalaǵa kelý ýaqytyn aıtyp únemi telefon arqyly habarlasyp turady. Sol kúni túngi saǵat 1-ler shamasynda jábirlenýshi kóliktiń synyp qalýyna baılanysty qonaqúılerdiń birinde qonatynyn da habarlaǵan.
«Jedel-izdestirý is-sharalary barysynda jábirlenýshiniń jol boıynda kúdiktimen tanysqany anyqtalady. Olar birge qonaqúıge ornalasady. Qonaqúıde jolseriginiń aqshasy bar ekenin bilgen kúdikti ony oramalmen tunshyqtyryp óltiredi de, izin jasyrady. Keıinnen, álgindeı jolmen kelgen aqshaǵa avtokólik te satyp alady. Qazir ustalǵan kúdiktige qatysty qylmystyq is qozǵaldy. Onyń basqa da qylmystarǵa qatystylyǵyn tekserý úshin qosymsha jedel-tergeý is-sharalary júrgizilýde», - dedi N. Oraz.
