Adam óltirip qashyp júrgen Túrkistan oblysynyń turǵyny Máskeýde ustaldy
TÚRKІSTAN. QazAqparat - Túrkistan oblysynyń polıtseıleri adam óltirgeni úshin 4 jyldan beri izdeýde júrgen qylmyskerdi Reseı astanasy Máskeý qalasynan ustady, dep habarlaıdy QazAqparat Túrkistan oblysy Polıtsııa departamentine silteme jasap.
Saryaǵash APB-niń polıtseıleri TO PD-niń Krımınaldy polıtsııa qyzmetkerlerimen birge 4 jylǵa jýyq izdestirýde júrgen, asa aýyr qylmys jasaǵan jergilikti turǵyndy ustady.
2015 jyly mamyr aıynda túngi ýaqytta Saryaǵash aýdandyq ishki ister bóliminiń kezekshi bólimshesine aýyldardyń birindegi emhanaǵa «eki aıaǵyna oq tıip jaraqat alǵan» er adamnyń denesi jetkizilgendigi týraly habarlama kelip túsedi.
Tekserý barysynda, bir aýyldyń eki turǵyny arasynda túsinbeýshilik týyndap, sońy eregiske ulasqandyǵy belgili bolady. Bir turǵyn eki tanysynyń kózinshe, eregesken adamdy qos aýyz myltyqpen atyp óltirgen.
Atalǵan jaıt boıynsha QR QK 99-baby «Adam óltirý» boıynsha qylmystyq is qozǵalǵan.
Asa aýyr qylmys jasaǵan turǵyn tergeýden boı tasalap júrgendikten oǵan halyqaralyq deńgeıde izdestirý jarııalaıdy.
Saryaǵash APB polıtseıleri adam óltirgen kúdiktiniń Reseı Federatsııasynyń Máskeý qalasynda júrgendigin anyqtap, ustalady.
1 shildede ol Reseıden Shymkent qalasyndaǵy ICh-167/11 mekemesine jetkizildi.
Qazirgi tańda Saryaǵash APB tergeý bólimshesi osy qylmystyq iske baılanysty tergeý amaldaryn júrgizýde.
