Adam óltirgen ózbekstandyq Aqtóbe arqyly Reseıge ótpek boldy
AQTÓBE. QazAqparat - Aqtóbeniń «Jaısań» shekara beketinde 28 jastaǵy Ózbekstan azamaty ustaldy. Kúdikti Qazaqstan arqyly Reseı terrıtorııasyna ótpek bolǵan, dep habarlaıdy QazAqparat tilshisi.
Aqtóbe oblysynyń polıtsııa qyzmetkerleri adam óltirgeni úshin halyqaralyq izdeýde júrgen Ózbekstan azamatyn ustady. Ózbekstannyń Ferǵana oblysy, Shuńqyr aýylynda qylmystyq oqıǵa tirkelip, 28 jastaǵy jigit 30 jastaǵy aýyldasyn ádeıi óltirip, qashyp ketken bolatyn.
«Aqtóbe oblystyq ІІD Krımınaldyq polıtsııa basqarmasynyń qyzmetkerleri ózbekstandyq áriptesterinen habarlama alyp, jedel izdestirý sharasyn uıymdastyrdy. Kúdikti Qazaqstan shekarasynan Reseıge ótpek bolǵan jerinen ustaldy. Ol «Jaısań avto» shekara beketinde qolǵa tústi. 1993 jylǵy Mınsk konventsııasyna sáıkes, kúdikti Aqtóbe qalasyndaǵy ýaqytsha tergeý ızolıatoryna qamaldy»,- dep málimdedi oblystyq ІІD baspasóz qyzmeti.
